(22:35-ի թարմացում) Ոստիկանությունը դեպքի վայրից տեսանյութ է հրապարակել
(15:35-ի թարմացում) Իրականացվում են օպերատիվ-հետախուզական միջոցառումներ. ոստիկանություն
Հունվարի 12-ին, ժամը 12.30-ին շտապ բուժօգնության կայանից ոստիկանության Կումայրիի բաժին ահազանգ է ստացվել, որ Գյումրի քաղաքի Մյասնիկյան փողոցի թիվ 188 տանը կան հրազենային վնասվածքից մահացածներ: Մեկնած օպերատիվ խումբը պարզել է , որ անհայտ անձը ինքնաձիգից արձակած կրակոցներով սպանել է նշված տան բնակիչներ՝ 1961 թ. ծնված Սերյոժա Ավետիսյանին, 1959 թ. ծնված Հասմիկ Ավետիսյանին, 1979 թ. ծնված Աիդա Ավետիսյանին, 1981 թ. ծնված Արմեն Ավետիսյանին, 1990 թ. ծնված Արաքսյա Պողոսյանին, Հասմիկ Ավետիսյանին /ծննդյան թիվը ճշտվում է/:
2014 թ. ծնված Սերյոժա Ավետիսյանը հրազենային վնասվածքներով տեղափոխվել է հիվանդանոց:
Ոստիկանության պետ Վլադիմիր Գասպարյանի հանձնարարությամբ անմիջապես ստեղծվել է օպերատիվ խումբ՝ ոստիկանության պետի առաջին տեղակալ Հունան Պողոսյանի գլխավորությամբ, որը մեկնել է Գյումրի: Գյումրիում աշխատում են ոստիկանության տարբեր ծառայությունների բարձրաստիճան սպաներից ձևավորված օպերատիվ խմբեր, հատուկ նշանակության ստորաբաժանման ծառայողներ:
Իրականացվում են անհետաձգելի օպերատիվ-հետախուզական փնտրողական համալիր միջոցառումներ: Ըստ նախնական տվյալների՝ հանցագործությունը կատարել է ժամկետային զինծառայող Վալերի Պերմյակովը: Հանցագործության բացահայտմանն ուղղված աշխատանքների ընթացքի մասին կտեղեկացնենք լրացուցիչ:
(15:30 թարմացում)
Սպանություն կատարելու կասկածանքով հետախուզվում է ժամկետային զինծառայող Վալերի Պերմյակովը:
Ոստիկանությունը հայցում է քաղաքացիների ուշադրությունը և աջակցությունը:
Լուսանկարում պատկերված անձին տեսնելու դեպքում խնդրում ենք անմիջապես զանգահարել 1-02 հեռախոսահամարով կամ դիմել ոստիկանության մոտակա բաժին:
(14:55 թարմացում)
Գյումրու Մյասնիկյան փողոցի թիվ 188 տանը լուսադեմին, մոտավորապես ժամը 06:20-ի սահմաններում հնչել են կրակոցներ: Ժամը 10-ի սահմաններում նշված տանը բնակվող մեկ ընտանիքի 6 անդամները հայտնաբերվել են մահացած: Ըստ նախնական տեղեկությունների` ընտանիքի 5 մեծահասակ եւ մեկ անչափահաս անձանց գնդակահարելու մեջ կասկածվում է Գյումրիում տեղակայված 102-րդ ռուսական ռազմաբազայի ռուս զինծառայող: Փրկվել է միայն 6-ամսական մանկահասակ երեխան, ում հայտնաբերելուց անմիջապես հետո տեղափոխել են Գյումրու Ավստրիական մանկական հիվանդանոց: Երեխան դաշույնահարված է եղել:
Առողջապահության նախարարությունից տեղեկացնում են, որ երեխան կրծքի շրջանում վերք է ունեցել: Նրա մոտ կատարվել է որովայնի խոռոչի օրգանների մանրակրկիտ հետազոտություն: Արդյունքում աարզվել է, որ որովայնի խոռոչի օրգանները վնասված չեն: 40 րոպե տևողությամբ վիրահատությունը բարեհաջող է անցել: Այժմ երեխան գտնվում է վերակենդանացման բաժանմունքում: Բժիշկները նրա առոջական վիճակը գնահատում են ծանր:
Շտապօգնության բուժքույրը «Հետքին» հայտնեց, որ երեխան եղել է մոր գրկում: Զարկերակը ստուգելուց հետո երեխան կենդանի է հայտնաբերվել, վերք ունի, և արագ տեղափոխվել է հիվանդանոց:
Գյումրու դատախազության հաղորդմամբ` հարուցվել է քրեական գործ Քրեական օրենսգրքի 104-րդ հատկանիշներով:
Լուսանկարը` Լեւոն Բարսեղյանի ֆեյսբուքյան էջից
Մեկնաբանություններ (4)
Մեկնաբանել