Ինչպես հայտնել էինք նախորդ հրապարակմամբ, Հայկ Կյուրեղյանի գործով դատական նիստը հետաձգվել էր մինչև ժամը 15:00-ն: Կենտրոն և Նորք-Մարաշ վարչական շրջանների ընդհանուր իրավասության դատարանի մոտ հավաքված քաղաքացիներին, ովքեր եկել էին ներկա գտնվելու Կյուրեղյանի նիստին, այս անգամ առհասարակ թույլ չտվեցին մտնել դատարանի շենք:  

«Հետքի» հարցին պատասխանելով՝ կարգադրիչները միայն նշեցին, որ դատավորի հրահանգն է՝ նիստին թույլատրել միայն լրագրողներին: Նիստին մասնակցել թույլ չտվեցին անգամ ամբաստանյալ Հայկ Կյուրեղյանի հորը՝ Արմենակ Կյուրեղյանին:

«Փաստորեն փակ նիստ են անում՝ խոչընդոտելով մեր իրավունքը՝ իբր պատճառաբանելով դատական նիստի ընթացքը խոչընդոտելու հանգամանքով: Բայց որևէ մեկը ինձ չի ասում, թե ինչպես եմ խոչընդոտել դատարանի աշխատանքը: Պարզ նպատակ է՝ ուզում են հանրային հնչեղություն չլինի»,- ասաց Կյուրեղյանի հայրը:

Փաստորեն, իսկապես Հայկ Կյուրեղյանը գտնվում էր դատարանում, ժամը 15:00-ին նրա ներկայությունն ապահովվեց: Դատավոր Բեկթաշյանը նկատեց, որ թեև ամբաստանյալը 10 ժամով հեռացված է նիստերից, այդուհանդերձ պաշտպանական ճառի ու վերջին խոսքի իրավունքից օգտվելու համար ապահովվել է նրա ներկայությունը:

«Բոլորը զարմացած են 14 տարի կրակելու վրա: Հիշեցի մի բան, որ Սերժ Սարգսյանը ընտրությունների ժամանակ ասեց՝ ինչքան կուզեմ՝ կխփեմ: Նույն տրամաբանության մեջ ա՝ ինչքան ուզի՝ կխփի մարդը՝ 14 տարի, 114 տարի: Բայց ես ասում եմ՝ չես խփելու էս անգամ, ես 14 տարի չեմ նստելու: Ով անհանգստանում ա իմ համար, ասում եմ՝ մի անհանգստացեք՝ ես ոչ ճնշվել եմ, ոչ էլ իմ մարտական ոգին ա իջել: Ես համոզված եմ, որ 14 տարի չեմ նստելու, որովհետև էս ռեժիմը կարող ա 14 օր էլ չդիմանա»,- ասաց Կյուրեղյանն իր պաշտպանական ճառում:

Իսկ երբ նրան տրվեց վերջին խոսքի իրավունքը, Կյուրեղյանն ասաց, որ ասելիքն ավարտել է:

Դատավոր Արմեն Բեկթաշյանը հեռացավ խորհրդակցական սենյակ: Դատավճիռը կհրապարակվի սեպտեմբերի 15-ին, ժամը 12:00-ին: