Ամալյա Մարգարյան

Այսօր Կենտրոն և Նորք-Մարաշ ընդհանուր իրավասության դատարանում  Մնացական Մարտիրոսյանինախագահությամբ շարունակվեց Արարատ Խանդոյանի և Արման Առաքելյանի գործով դատական նիստը: Ամբաստանյալները մեղադրվում են 2016-ի հուլիսի 20-ին Խորենացի փողոցում զանգվածային անկարգություններին մասնակցելու և դրանց ընթացքում ոստիկանության աշխատակիցների նկատմամբ բռնություն  գործադրելու մեջ։

Նիստի ընթացքում վկայությամբ հանդես եկան ոստիկանության երեք աշխատակիցներ:

Ոստիկանության աշխատակից Վահան Հովհաննիսյանը ներկայացրեց, որ հուլիսի 20-ին պարետապահակային ծառայություն է իրականացրել Խորենացի փողոցում, որտեղ «ամբոխի» կողմից տեղի են ունեցել անկարգություններ, իսկ ոստիկանության աշխատակիցները շղթա են կազմել. «Շղթային մոտեցավ մի խումբ ամբոխ, քարերով, շշերով հարվածում էին, փորձում էին ճեղքել ոստիկանության շղթան»,-նշեց վկան:

Ոստիկանության աշխատակիցն ասաց, որ ամբաստանյալներին չի ճանաչում: Վկայության ընթացքում Վ. Հովհաննիսյանը նշեց նաև, որ  քաղաքացիների ձեռքին չի տեսել արգելված իրեր: Նշեց նաև, որ քաղաքացիները փորձել են ճեղքել ոստիկանության շղթան` գոռալով, որ ուզում են սնունդ հասցնել ՊՊԾ գրավված գունդ:

Արարատ Խանդոյանի այն հարցին` արդյոք ոստիկաններն իրենց մահակներով չե՞ն հարվածել քաղաքացիներին, վկան պատասխանեց` ոչ, ապա շարունակեց, որ իրենք միայն հրամանի դեպքում կարող են առաջ գնալ:

Ամբաստանյալների պաշտպան Արա Կարագյոզյանի այն հարցին` արդյո՞ք բոլոր հրամաններն են կատարվում, վկան դրական պատասխան տվեց, ապա փաստաբանը շարունակեց հարցադրումը. «Ի՞նչ կանեին ոստիկանները, եթե քաղաքացիների կյանքին վտանգ սպառնացող  հրաման արձակվեր»:

«Իմ ծառայության ընթացքում երբևէ այդպիսի հրաման չեմ ստացել»,- պատասխանեց Վ. Հովհաննիսյանը:

Երկորդ վկան 10.33 վաշտի հրամանատար Սամվել Բաղդասարյանն էր, ով դատարանում հայտնեց, որ իրենց ստորաբաժանումն այդ օրը ՊՊԾ գնդի տարածքում է ծառայություն իրականացրել, երբ իմացել են  զանգվածային անկարգությունների մասին մոտեցել են Խորենացի, սակայն «աժոտաժն» ավարտված է եղել:

Նիստի ընթացքում վկայություն տվեց նաև կապիտան Արման Ասլանյանը, ով նշեց, որ ծառայություն իրականացնելու ժամանակ իր տեսադաշտում է հայտնվել մի անձ, ով ձեռքերով ու ոստքերով հարվածել է ոստիկանության աշխատակիցների ուղղությամբ:

Պաշտպանական կողմի հարցադրումներից պարզվեց, որ վկան հուլիսի 20-ին ոստիկանական համազգեստով չի եղել, չի կրել նաև տարբերանշան: Կապիտան Ա. Ասլանյանը նշեց նաև, որ որևէ մեկի ձեռքին արգելված իր չի տեսել, տեսել է միայն օդում «թռչող իրեր»:

Պաշտպանական կողմը խնդրեց վկային ներկայացնել նաև` ինչպե՞ս է Արարատ Խանդոյանը բերման ենթարկվել, վկան չհիշեց` պատճառաբանելով իր ծանրաբեռնված լինելը:

Արարատ Խանդոյանը միջնորդեց, որ ընթերցվեն վկայի նախաքննական ցուցմունքները, քանի որ վկան չէր հիշում իր կատարած գործողությունները, իսկ դատարանում տված ցուցմուքներում առաջացել էին հակասություններ:

Արարատ Խանդոյանի գործով նախաքննության ընթացքում ՀՀ ոստիկանության կազմակերպված հանցագործությունների դեմ պայքարի բաժնի ավագ լեյտենանտ, հիմա կապիտան դարձած Ա. Ասլանյանն իր նախաքննական ցուցմունքում նշել էր, որ տեսել է իր գործողություններով աչքի ընկնող  «40-45 տարեկան, ագրեսիվ հայացքով, կարմիր վերնաշապիկով, մուգ մաշկով» մի քաղաքացու, նրան հնարավոր չի եղել մեկուսացնել, կատարված ուսումնասիրությունից հետո պարզել են, որ այդ մարդը ՊՊԾ գունդը  գրավված անձանցից Արայիկ Խանդոյանի եղբայրն է:

Վկաների հարցաքննությունից հետո, ամբաստանյալ Արման Առաքելյանը միջնորդությամբ հանդես եկավ` դատարանին խնդրելով իր քրեական գործն առանձնացնել Արարատ Խանդոյանի գործից` նշելով, որ վերջինիս գործը քաղաքական բնույթ է կրում:

Դատարանը բավարարեց միջնորդությունը` բացառելով  Արարատ Խանդոյանի գործը բնութագրող որակումները:

Արման Առաքելյանի գործով հաջորդ նիստը տեղի կունենա փետրվարի 6-ին, իսկ Արարատ Խանդոյանի գործով նիստը փետրվարի 9-ին:

Հիշեցնենք, որ Արարատ Խանդոյանի և Արման Առաքելյանի նկատմամբ մեղադրանք է առաջադրվել ՀՀ Քրեական օրենսգրքի 225-րդ հոդվածի 2-րդ մասով (պատժվում են ազատազրկմամբ` երեքից ութ տարի ժամկետով, եթե այդ արարքները կատարելն ինքնին չի առաջացնում սույն օրենսգրքի այլ հոդվածներով ավելի խիստ պատասխանատվություն):