Կառավարությունն այսօրվա նիստում չքննարկվող կարգով հավանության արժանացրեց կառավարության աշխատակազմի ղեկավար-նախարար Դավիթ Հարությունյանի որոշման նախագծը, որով հաստատվեց, որ ապրիլի 2-ին կայանալիք ընտրական գործընթացները տեսանկարահանելու և տվյալները մշակելու համար պաշտպանված տվյալների կենտրոնում տարածք վարձակալելու նպատակով կառավարության աշխատակազմին կառավարության պահուստային ֆոնդից կհատկացվի 3 միլիոն դրամ։

Բացի այդ, գործադիրը քննարկվող ընթացակարգով հաստատեց Հայաստանի փոխոստիկանապետ Վարդան Եղիազարյանի որոշման նախագիծը, որով ոստիկանությանը նույնպես կտրամադրվի 3 միլիոն դրամ՝ նույն ընտրությունների համար՝ ընտրատեղամասերում ընտրողների մատնահետքերը էլեկտրոնային ընտրացուցակներին կցագրելու, տվյալների ծրագրային բազա ստեղծելու նպատակով։

Ինչպես նշվում է ներկայացված որոշման նախագծում՝ այդ գնումը համարվում է անհետաձգելի, և այն կկատարվի բանակցային ընթացակարգով։

Հիշեցնենք, որ փետրվարի 16-ի կառավարության նիստին ընտրողների ինքնությունը ստուգող տեխնիկական 5000 սարքերի ստացման, պահեստավորման, պահեստային տարածքում դրանց կոմպլեկտավորման, համապատասխան տարածքային ընտրական հանձնաժողովներ և ետ` պահեստային տարածք տեղափոխման, պահեստային տարածքում սարքերի տեխնիկական սպասարկման աշխատանքները կատարելու նպատակով 30 միլիոն դրամ էր հատկացվել։