HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Կիևում ոստիկանները արցունքաբեր գազ են կիրառել բարեփոխումներ պահանջող ցուցարարների դեմ

Ուկրաինացի ոստիկանները արցունքաբեր գազ են կիրառել Կիևում երկրի խորհրդարանի շենքի մոտ հավաքված ցուցարարների դեմ: Այս մասին հաղորդում է РИА Новости-ն՝ հղում անելով УНИАН գործակալությանը:

Աղբյուրի փոխանցմամբ՝ իրավապահները փորձել են գրոհել այն հատվածը, որտեղ ցուցարարները վրաններ են տեղադրել: Ոստիկանների կիրառած արցունքաբեր գազից տուժել է նաև պատգամավոր, «Սամոպոմոշ» կուսակցության ներկայացուցիչ Եգոր Սոբոլևը:

«Գազով թունավորում են, ոտքերով հարվածում են ծնկներին, փորձում են դուրս հանել մարդկանց: Ղեկավարները թաքնվում են թիկունքում՝ չբացատրելով, թե ով է տվել հրամանը և թե որ օրենքի շրջանակներում են նրանք գործում»,- գրել է պատգամավորը իր ֆեյսբուքյան էջում: Ոստիկանությունը չի հերքում, որ արցունքաբեր գազ է կիրառել, սակայն նշում է, որ դրանք եզակի բնույթ են կրել:

РИА Новости-ի հաղորդմամբ՝ ոստիկանները և Ազգային գվարդիայի ներկայացուցիչները ցանկապատ են տեղադրել Գրուշեվսկի, Շելկովիչնայա և Լիպսկայա կենտրոնոկան փողոցներում: Ոստիկանները ոչ ոքի չեն թույլատրում մոտենալ վրաններին՝ չներկայացնելով պատճառները: Ավելի ուշ հայտնի դարձավ, որ ցուցարարների և ոստիկանների միջև ծեծկռտուքը սկսվել է այն ժամանակ, երբ իրավապահները փորձել են վերադարձնել պաշտպանական վահանները, որոնք ցուցարարները նախօրեին խլել էին ոստիկաններից:


Լուսանկարը՝ РИА Новости/Стрингер

Ավելի վաղ Ուկրաինայի գլխավոր դատախազ Յուրի Լուցենկոն իր ֆեյսբուքյան էջում գրել էր, որ իրավապահ մարիմնները չեն խոչընդոտի բողոքի ակցիաների անցկացմանը: Դատախազի խոսքերով՝ ոստիկանները պարտավորվում են ապահովել ցուցարարների անվտանգությունը:

Ռադայի շենքի մոտ «Միխոմայդան» անունը ստացած բողոքի ակցիան սկսվել է հոկտեմբերի 17-ին: Երկրի ազգայնական կուսակցությունների՝ «Ազգային կորպուս»-ի, «Ազատության», ինչպես նաև Միխաիլ Սահակաշվիլիի «Նոր ուժերի շարժման», «Բատկիվշինա»-ի, «Սամոպոմոշ»-ի և այլ տարբեր հասարակական կազմակերպությունների դրոշներով մի քանի հազար ցուցարարներ պահանջում են չեղարկել պատգամավորների անձեռնմխելիությունը, փոխել ընտրական օրենսգիրքը և ստեղծել հակակոռուպցիոն դատարան: Ինչպես հայտարարել է Վրաստանի նախկին նախագահ Միխաիլ Սահակաշվիլին, ով գլխավորում է բողոքի ակցիան, եթե իրենց պահանջները չկատարվեն, ապա կսկսեն պահանջել երկրի նախագահ Պյոտր Պորոշենկոյի հրաժարականը: Վերջինս պատրաստակամություն է հայտնել անձամբ հանդիպել ցույցի կազմակերպիչներից մեկին՝ պատգամավոր Մուստաֆա Նայեմին, ով նախկինում «Պորոշենկոյի դաշինք» խմբակցության անդամ էր:

Այնուհետև բողոքի ակցիայի մասնակիցները վրաններ են տեղադրել խորհրդարանի հարևանությամբ՝ հայտնելով, որ չեն հեռանա այդտեղից մինչև չկատարվեն իրենց պահանջները: Ուկրաինայի Ներքին գործերի նախարարության տվյալներով՝ քաշքշուկների հետևանքով կա 5 տուժած, որոնցից 3-ը ցուցարար, իսկ 2-ը իրավապահ մարմինների ներկայացուցիչ:

Գլխավոր լուսանկարը՝ Reuters/Valentyn Ogirenko

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter