Վրաստանի նախկին նախագահ, Օդեսայի նախկին նահանգապետ Միխեիլ Սահակաշվիլիի աջակիցները ազատեցին նրան ոստիկանական միկրոավտոբուսից, երբ ուժայինները «Նոր ուժերի շարժման» առաջնորդին փորձում էին տեղափոխել ոստիկանական բաժանմունք, հաղորդում է РИА Новости-ն:

49-ամյա քաղաքական գործիչը ձերբակալվել էր մի քանի ժամ առաջ: Մինչև այդ նա սպառնում էր իրեն ցած նետել ութհարկանի շենքի տանիքից: 

Միկրոավտոբուսից դուրս գալուց հետո Սահակաշվիլին և իր կողմնակիցները շարժվել են դեպի Գերագույն Ռադայի շենք, որտեղ էլ կշարունակեն իրենց հանրահավաքը: Ցուցարարները վանկարկում են՝ «Իմպիչմենթ», «Բանդա հեռացի՛ր» «Փա՛ռք Ուկրաինային»: Նրանք բարիկադներ են տեղադրում Ռադայի շենքի պատերի մոտ:

Սահակաշվիլիին ազատելու ժամանակ բախումներ են տեղի ունեցել ցուցարարների և իրավապահ մարմինների միջև: Բողոքի ակցիայի մասնակիցների նետած քարերին ուժայինները պատասխանել են արցունքաբեր գազով:

«Այս մարդիկ չեն հասկանում, թե ում հետ գործ ունեն: Տեսեք, թե ուկրաինացիները ինչպես են աջակցում ինձ: Մենք շարունակում ենք պայքարը»,- ազատվելուց հետո հայտարարել է Վրաստանի նախկին նախագահը:

Ուկրաինայի իշխանությունները Միխեիլ Սահակաշվիլիին մեղադրում են հանցավոր կազմակերպությունների հետ համագործակցելու և նրանց հանցավոր գործունեությունը թաքցնելու մեջ: Նրան սպառնում է 3-5 տարվա ազատազրկում:

Լուսանկարը՝ REUTERS / Gleb Garanich