Կառավարությունն այսօրվա նիստում որոշեց ավելի քան 96 միլիոն դրամ արժեքով գույքն անհատույց օգտագործման իրավունքով հանձնել ԱԺ պատգամավոր Սամվել Ալեքսանյանի դստեր՝ Աստղիկ Ալեքսանյանի ընկերությանը։

«Չեխ-Արմ-Ինվեստ» ընկերությանը 20 տարի ժամկետով փոխանցվեց «Արթիկի թիվ 7 ավագ դպրոց»-ի վերակազմակերպման արդյունքում ազատված շենքն ու  շինությունները, դրանց զբաղեցրած հողատարածքը։ Գործադիր որոշման այս նախագիծը ներկայացրել էր պետական գույքի կառավարման վարչության պետ Արման Սահակյանը։

Իրավաբանական անձանց պետական ռեգիստրի տվյալներով՝ «Չեխ-Արմ-Ինվեստ» ընկերությունը նորաստեղծ է։ Այն հիմնադրվել է այս տարվա սեպտեմբերի 15-ին։ Դրա սեփականատերերից մեկը Աստղիկ Ալեեքսանյանն է, մնացած՝ 50 տոկոս բաժնեմասը պատկանում է  Չեխիայի Հանրապետությունում գրանցված «GALYA STYLE» ընկերությանը։ Ռեգիստրի տվյալներով՝ ընկերության սեփականատերը Արսեն Սարգսյանն է, իսկ գործադիր տնօրենները եղբայրները՝ Արմեն և Անուշավան Սարգսյանները։ Ընկերությունը եղբայրները անվանել են մոր՝ Գալյա Սարգսյանի անունով։

Աստղիկ Ալեքսանյանը զբաղվում է տեքստիլ արտադրությամբ,  նրա ներկայացրած արտադրանքը շուկայում հայտնի է «Ալեքս տեքստիլ» անունով։

Մասնավորապես՝ ընկերությունը ստացավ 7316 քառ. մետր ընդհանուր մակերեսով դպրոցի շենքը (երկու հարկ և նկուղ), 40  քառ. մետր մակերեսով ենթակայանը, 25 քառ.մետր մակերեսով օժանդակ շինությունը, 87 քառ. մետր մակերեսով պարիսպը և դրանց զբաղեցրած, օգտագործման ու սպասարկման համար անհրաժեշտ 0.76 հա հողատարածքը։

Թե անհատույց իրավունքով հանձնված գույքի 96 միլիոն դրամ գնահատումը, պետգույքի վարչությունը երբ է կատարել՝ անհայտ է։ Սովորաբար օտարվող և անհատույց իրավունքով հանձնվող պետական գույքի վերաբերյալ որոշման նախագծերում նշվում է, թե գույքը որ օրվա դրությամբ է այդքան գնահատվել, սակայն այս որոշման նախագծում այդ տեղեկատվությունը բացակայում է։

Ինչպես ասվում է կառավարություն  ներկայացված որոշման նախագծում,  Շիրակի մարզի Արթիկ քաղաքում տեքստիլ արտադրություն կազմակերպելու նպատակով ընկերությունը գրությամբ դիմել է պետական գույքի կառավարման վարչություն։

Ընկերությունը կարի արտադրություն է հիմնելու այդ տարածքում՝ խոստանալով 3 տարում ներդնել 1 մլն դոլար՝ դրանք ուղղելով անշարժ գույքի վերանորոգման և արտադրության համար անհրաժեշտ սարքավորումների ձեռքբերմանը։

Ըստ որոշման նախագծի՝  «Չեխ-Արմ-Ինվեստ»-ը ներդրումային ծրագրի շրջանակներում խոստացել է ստեղծել 500 աշխատատեղ. առաջին տարում՝ 300 աշխատատեղ, իսկ դրան հաջորդող յուրաքանչյուր երկու տարիներին ևս 200 աշխատատեղ։

Պետական գույքի կառավարման վարչության պետին հանձնարարվել է երկամսյա ժամկետում ընկերության հետ կնքել անշարժ գույքի անհատույց օգտագործման պայմանագիր։ Ընկերությունը պարտավոր է իր կողմից ներկայացված ծրագրով նախատեսված աշխատանքների կատարումը հավաստող համապատասխան փաստաթղթերը ներկայացնել պետգույքի կառավարման վարչություն՝ յուրաքանչյուր տարվա ավարտից հետո 15-օրյա ժամկետում։

Սահմանված ներդրումային պարտավորությունները չկատարելու կամ մինչև 50 % կատարելու դեպքումը ընկերությունը 3 ամսվա ընթացքում պարտավոր է կատարել նախատեսված, բայց չկատարած ներդրումներն ամբողջությամբ, ինչպես նաև պետբյուջե վճարել տուգանք՝ չկատարված ներդրումների գումարի 20 % չափով։ Իսկ սահմանված ժամկետում նախատեսված ներդրումները 50 կամ ավելի տոկոսով կատարելու, ընկերությունը 2 ամսվա ընթացքում պարտավոր է կատարել նախատեսված և չկատարած ներդրումներն ամբողջությամբ` միաժամանակ կրկին պետբյուջե վճարելով տուգանք՝ չկատարած ներդրումների գումարի 15 % չափով։

Ընկերության կողմից ստանձնած պարտավորությունները չկատարելու կամ ոչ պատշաճ կատարելու դեպքում կնքված պայմանագիրը ենթակա է լուծման:

Lուսանկարը՝ alextextile.am-ի