HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

«Տաքսիստներն օդանավակայանի արգելափակոցն անցնելու համար 30 հազար դրամ են վերցնում՝ որպես երկրի մուտքի վճար». զբոսավարներ

«Տաքսիստներ կան, որ օդանավակայանի արգելափակոցին են մոտենում, ասում են՝ սա Հայաստանի մուտքի գումարն է՝ 30 հազար դրամ, պետք է վճարեք»,- ասում է զբոսավար Սամվել Գասարջյանը:

Վերջինս պատմում է, որ 3-4 ամիս առաջ շուրջ 20 հոգուց բաղկացած խումբ էր դիմավորել: Խումբը 30-40 րոպե սպասել էր ևս 2 հոգու, հետո զանգել էին գրասենյակ, որ տեղեկանային՝ արդյոք այդ երկու հոգին ժամանել են, թե նրանց այցը հետաձգվել է: Պարզվել էր, որ նրանք արդեն հյուրանոցում էին, և տաքսու վարորդն օդանավակայանի արգելափակոցն անցնելու ժամանակ նրանցից 30 հազար դրամ էր վերցրել՝ իբրև Հայաստան մուտք գործելու վճար:

Սամվելը զբոսավար է աշխատում ավելի քան 2 տարի, սակայն վերջին ամիսներին «Զվարթնոց» օդանավակայանի ներսում տիրող իրավիճակով անհանգստացած է: Խնդիրը ժամանման սրահում հավաքվող տաքսու վարորդներն են, որոնք, ըստ նրա, ոչ միայն հաճախ վեճեր, անախորժություններ են ստեղծում զբոսավարների հետ, այլև սկսել են զբոսաշրջիկ «փախցնել»:

Սամվելի փոխանցմամբ՝ այս ամիսներին վիճակը հատկապես սրված է լինում Դուբայի և Շարժայի չվերթներրի ժամանակ, որոնցով հիմնականում գալիս են հնդիկներն ու ֆիլիպինցիները: Ի տարբերություն ռուս զբոսաշրջիկների՝ վերջիններս տեղեկացված չեն  անհատական տաքսիների գնային սանդղակից, ինչի պատճառով էլ հաճախ հայտնվում են անբարեխիղճ վարորդների ծուղակում:

Մոտ 5 տարի զբոսավար աշխատող Տաթևիկ Խորենյանը պատմում է օրեր առաջ իրեն պատահած դեպքը: Կալկաթայից եկող գործարար հնդիկների խմբի էր դիմավորել՝ կազմված 160 հոգուց: Պատահական տեսել է, թե տաքսու վարորդն ինչպես է խմբի անդամներից մեկին տանում, ու երբ հարցրել է, թե ուր է տանում, վարորդն ասել է՝ «էն մյուս ավտոն էլ ճանապարհին է»: Հետո պարզել են, որ զբոսաշրջիկներից երեք հոգու տաքսիստները Ծաղկաձոր տանելիս են եղել, սակայն կազմակերպիչներին հաջողվել է Չարենցավանի ճանապարհից նրանց վերադարձնել Երևան:

Տաթևիկն ասում է, որ օդանավակայանից հյուրանոց տեղափոխելու (տրանսֆերի) գումարը նախապես վճարած զբոսաշրջիկներից (այսինքն՝ նրանցից, ումից տեղափոխման գումար չեն կարող վերցնել) նրանց «փախցնող» վարորդները պահանջում են վճարել օդանավակայանի տարածքից դուրս գալու ժամանակ՝ արգելափակոցն անցնելիս, իբր թե դա Հայաստան մուտք գործելու վճարն է:

Զբոսավարը մեկ այլ օրինակ էլ է նշում: Ասում է, որ օդանավակայանի ներսում գեղեցիկ հագնված տղամարդ է կանգնում՝ զբոսաշրջիկներին հաճախ ներկայանալով որպես մենեջեր: Զբոսաշրջիկներին մի կողմ տանելով՝ ձեռքում եղած ցուցակի մեջ փնտրում է նրանց անունները, հետո, իբր չգտնելով, առաջարկում է տաքսու վարորդի օգնությանը դիմել: Ու, որպես կանոն, այդ վարորդները «մենեջերի» ընկերներն են:

Պրոֆեսիոնալ զբոսավարների հայկական ասոցիացիայի անդամ Անահիտ Ավագյանն էլ ասում է, որ երբ գնում է օդանավակայանում խումբ դիմավորելու, գիտի, որ այդ օրը վեճ է ունենալու տաքսիստների հետ:

Անահիտը նշում է, որ ժամանման սրահում՝ ելքի երկու կողմերում, հավաքվում են 15-ի հասնող տաքսիստներ՝ հիմնականում ոչ պատշաճ վարքագծով, խոսելաձևով: Ըստ զբոսավարի՝ նրանք այնքան խիտ են կանգնում ելքի մոտ, որ նույնիսկ փակում են «stop» նշանը, ու ճամպրուկներով բեռնված սայլակով ժամանող զբոսաշրջիկը չի կարողանում անցնել: Անահիտն ասում է, որ այս պարագայում երբ դիմում են տեղում ծառայություն իրականացնող ոստիկաններին, նրանք ձայն չեն հանում:

«Տաքսիստները խոչընդոտում են զբոսաշրջիկների ժամանմանը, դիմավորմանը, տեղափոխմանը, նույնիսկ եթե տրանսֆերն արդեն կազմակերպված է, նրանք խանգարում են զբոսաշրջության ոլորտին»,- նշում է զբոսավար Անահիտը: Նրա համոզմամբ՝ խնդիրը երկու բաղադրիչ ունի. առաջինը զբոսաշրջիկին խոչընդոտելն է, երկրորդը՝ զբոսավարին:

Պրոֆեսիոնալ զբոսավարների հայկական ասոցիացիայի վարչության անդամ Կատար Թասլակյանն էլ նշում է, որ իրենք դեմ չեն տաքսիստների աշխատանքին, նրանք էլ թող իրենց ծառայությունը մատուցեն, բայց ոչ զբոսաշրջիկ «փախցնելով», զբոսավարների հետ վիճելով, ինչի հետևանքով մարդիկ հայտնվում են սթրեսային իրավիճակներում:

Ստեղծված պայմաններում, ըստ մեր զրուցակիցների, տուժում է Հայաստանի հեղինակությունը: Դեպքեր են լինում, երբ խաբված զբոսաշրջիկն ասում է, թե թող չհամոզեն, որ Հայաստանը լավն է: Մանրուքներից փոխվում է երկրի մասին տպավորությունը:

Կատար Թասլակյանի փոխանցմամբ՝ առաջիկայում զբոսավարները պատրաստվում են նամակ գրել պատկան մարմիններին, մասնավորապես՝ քաղավիացիայի կոմիտեի նախագահին, ոստիկանությանը: Կատարը նշում է, որ 3 տարի առաջ զբոսավարները հանդիպել էին քաղավիացիայի նախկին ղեկավար Սերգեյ Ավետիսյանին, ներկայացվել էր հարցերի լայն շրջանակ, այդ թվում՝ օդանավակայանի ներսում կանգնող անհատական տաքսիների հարցը: «Այն ժամանակ այսպիսին չէր իրավիճակը, սակայն հարցը լուծում չստացավ: Մենք լուծում ենք պահանջելու նրանցից»,- ասում է զբոսավար Կ. Թասակյանը:

Լուսանկարը՝ smolensk-i.ru-ից

Մեկնաբանություններ (2)

Scammed 20k
From Czech republic. This morning I was charged 20000 DRAM from airport to a park in the middle of Yerevan!! I did not know how much money this is because I did not download any currency app before coming. Now I know what happened!! And they work as a group. If they know you go to the city , 4 of them all corner you to take their taxi!! The one who scammed me even just started carrying my luggage without asking
Scandinavian
This problem was in every East European country in 1990's. The governments solved it. Now it is time to do the same in Armenia.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։