Երևան քաղաքի ընդհանուր իրավասության դատարանը, նախագահությամբ դատավոր Արմեն Բեկթաշյանի, մեկ շաբաթ առաջ մերժել է Նուբարաշեն քրեակատարողական հիմնարկում այսօր մահացած Մհեր Եղիազարյանի նկատմամբ գրավ կիրառելու վերաբերյալ նրա պաշտպանների միջնորդությունը: Այս մասին «Հետքի» հետ զրույցում ասաց Եղիազարյանի պաշտպան Վահե Արմենակյանը:

Պաշտպանի խոսքով՝ Ազգային ժողովի երկու պատգամավոր` Սերգեյ Բագրատյանը և Նաիրա Զոհրաբյանը, երաշխավորություն էին տվել, որ ազատության մեջ հայտնվելու դեպքում Եղիազարյանը պատշաճ վարքագիծ կդրսևորի, առաջարկվել էր նաև գրավ` հինգ միլիոն դրամի չափով, սակայն այս ամենով հանդերձ` դատարանը մերժել էր իրենց կողմից ներկայացված միջնորդությունը: Առաջին ատյանի դատարանի որոշումը պատշտանների կողմից արդեն իսկ բողոքարկվել էր Վերաքննիչ քրեական դատարան, և պետք է քննվեր հունվարի 29-ին:

Նշենք, որ Մհեր Եղիազարյանը եղել է Haynews.am կայքի պատասխանատուն, մեղադրվում էր կաշառքի միջնրդություն կատարելու մեջ, և կալանավորվել էր 2018 թվականի դեկտեմբերի 3-ին: Դրանից երկու օր անց՝ դեմտեմբերի 5-ին, հացադուլ էր հայտարարել և 44 օր շարունակ հրաժարվել սնունդ ընդունել, պաշտպանի խոսքով՝ այս ընթացքում միայն ջուր է խմել: Քրեակատարողական հիմնարկն առաջարկել է նաև, որ Եղիազարյանը կաթիլային ներարկման միջոցով գլյուկոզա ստանալ, սակայն վերջինս հրաժարվել է նաև դրանից:

Թե ըստ մեղադրանքի կոնկրետ ինչ պաշտոնյայի կաշառք ստանալու միջնորդություն է կատարել Եղիազարյանը, պաշտպանը չի ցանկանում մանրամասնել, սակայն Եղիազարյանի վերաբերյալ գործը համարում է «շարքային գործ» ու վստահեցնում, որ նմանատիպ գործերով անցնող շատ մեղադրյալներ գտնվում են ազատության մեջ:

Նշենք, որ Ազգային անվտանգության ծառայությունն ավելի վաղ հայտնել է այն մասին, որ «Հայոց Արծիվներ. Միասնական Հայաս­տան» կուսակցության փոխնախագահ Մհեր Եղիազարյանը  2014թ. փետրվարից մինչև 2018թ. հոկտեմբերն ընկած ժամանակահատ­վածում, անձամբ, կամ միջնորդների միջոցով, չարաշահելով ՀՀ մի շարք քաղաքացիների, այդ թվում առանձին զինծառայողների վստահությունը, ծառայության կամ աշխա­տանքի տեղա­վորելու, ծառայողական առաջխաղացման, կամ այլ տարաբնույթ հարցեր լուծելու համար, կաշառք տալու պատրվա­կով նրանցից պահանջել, ստացել և առանց որևէ գործողություն կատարելու խար­դախությամբ հափշտակել է 180 հազար դրամից մինչև առանձնա­պես խոշոր չափերի հասնող՝ 10 հազար ԱՄՆ դոլարին համարժեք 4 մլն 775 հազար ՀՀ դրամ­:

Վահե Արմենակյանի խոսքով՝ իր պաշտպանյալի հացադուլ հայտարարելու պատճառն իր գործով անարդար քննություն իրականացնելն է, իրեն կալանքի տակ պահելու դատարանների որոշումները, և իրենք`պաշտպանները թե՛ նախաքննական մարմնի, թե՛ դատարանների ուշադրությունը հրավիրել են Եղիազարյանի առողջական խնդիրների վրա:

Եղիազարյանը, պաշտպանի խոսքով, առողջական վատ վիճակում մեկ շաբաթ առաջ մասնակցել է իր նկատմամբ գրավ կիրառելու միջնորդության քննությանը:

«Ակնհայտ էր, որ առողջական ծանր վիճակում էր գտնվում, բայց գրավը մերժեցին»,- ասաց Արմենակյանը:

Պաշտպանի խոսքով` քրեակատարողական հիմնարկում Եղիազարյանի նկատմամբ պատշաճ վերաբերմունք և խնամք է եղել, երկու անգամ` մեկը նախորդ տարեվերջին և մյուսը հավանավար, հունվարի 10-ին, նրա համար շտապօգնություն է հրավիրվել և տեղափոխվել է «Էրեբունի» բժշկական կենտրոն, սակայն այնտեղ ասել են, որ առողջական վիճակը նորմալ է, և ստացիոնար բուժման կարիք չունի:

«Հնարավոր չէ, որ մարդը շուրջ 30 օր հացադուլի մեջ լինի, ու նրա առողջական վիճակը նորմալ լինի կամ չունենա բժիշկների ստացիոնար հսկողության կարիք»,- կարծում է պաշտպանը:

Էրեբունի բժշկական կենտրոնի տնօրեն Միքայել Մանուկյանը մեզ հետ զրույցում նշեց, Մհեր Եղիազարյանն իրենց մոտ է տեղափոխվել հունվարի 9-ին, կոնկրետ գանգատով, վիրաբույժի ուղեկցությամբ տարվել է ռենտգեն հետազոտության, արվել է սոնոգրաֆիա, և բժիշկն ասել է, որ անպայման պետք է նրան թերապևտը զննի ու անալիզներ արվեն՝ հասկանալու համար, թե ինչպես՝ հացադուլն անդրադարձել Եղիազարյանի առողջական վիճակի վրա: Ըստ Մանուկյանի՝ սոնոգրաֆիան կատարելուց հետո ուղեկցողներն ինքնակամ նրան տարել են հիվանդանոցից:

«Հիվանդության պատմության մեջ գրված է, որ նա ինքնակամ լքել է հիվանդանոցն՝ առանց բժշկի խորհուրդը  լսելու»,- ասաց Միքայել Մանուկյանը՝ շեշտելով, որ իրենց նման պայմաններում չէին կարող եզրակացություն տալ, որ Եղիազարյանի վիճակը նորմալ է կամ ստացիոնար բուժման կարիք չունի:

Ըստ Արմենակյանի` իրենք դիմել են նաև Մարդու իրավունքների պաշտպանին, սակայն, ըստ էության իրենց՝ պաշտպանների կողմից իրականացված բոլոր քայլերն ապարդյուն են անցել:

Մենք կապվեցինք նաև Մարդու իրավունքների պաշտպանի գրասենյակի հետ՝ պարզելու, թե ինչ քայլեր են ձեռնարկվել գրասենյակի աշխատակիցների կողմից՝ կապված Եղիազարյանի պաշտպանների կողմից իրենց ներկայացված դիմումի հետ: ՄԻՊ քարտուղար Նունե Հովսեփյանը խոստացավ ավելի ուշ մանրամասներ հայտնել:

Լուսանկարում՝ դատավոր Արմեն Բեկթաշյանը և կալանավոր Մհեր Եղիազարյանը