HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Դալմայի այգիներում Գարեգին Նուշիկյանի ընկերությունը ժամանցի և զվարճանքի կենտրոն է կառուցելու. ԲՆ-ն դրական եզրակացություն է տվել

Բնապահպանության նախարարությունը դրական եզրակացություն է տվել Երևան քաղաքի Մոնթե Մելքոնյան 31 հասցեում «Երևան պարկ» ընտանեկան ժամանցի և զվարճանքի կենտրոն կառուցելու նախագծին: Նախագիծը ներկայացրել է ԱԺ նախկին պատգամավոր Գարեգին Նուշիկյանին պատկանող «Պարկ գրուպ» ՍՊԸ-ն:

Ընկերությունը հիմնադրվել է 2017թ. հուլիսի 12-ին: 2018թ. հունվարի 11-ին կառավարությունը, Կարեն Կարապետյանի գլխավորությամբ, որոշում է կայացրել 27,66 հա-ն Նուշիկյանի ընկերության ներդրումային ծրագրի իրականացման նպատակով, առանց մրցույթի, վարձակալության իրավունքով, 99 տարի ժամկետով տրամադրել «Պարկ գրուպ» ՍՊԸ-ին:

Կառավարությունն այդ որոշմամբ Երևանի քաղաքապետին առաջարկել է նաև ապահովել Երևան քաղաքի Մոնթե Մելքոնյան փողոցին հարակից տարածքում գտնվող 27,66 հեկտար պետական սեփականություն հանդիսացող անտառային ֆոնդի հողերի նպատակային նշանակության փոխադրումը հատուկ պահպանվող տարածքների հողերի նպատակային նշանակության: 

Համաձայն նախագծի՝ ընտանեկան ժամանցի և զվարճանքի կենտրոնը կառուցվելու է Դալմայի այգիներում: Այն իրենից ներկայացնելու է ժամանակակից զբոսավայր՝ եվրոպական չափանիշներին համապատասխան ատրակցիոններով, ջրային և կանաչապատ տարածքներ, սպասարկման կետեր և ավտոկայանատեղիներ:

Այդ նպատակով վարձակալության է տրվել 26 հա հող, 2 հա էլ նախատեսված է կառուցապատման համար: Այսինքն՝ տոկոսային հարաբերությամբ տարածքի ընդհանուր մակերեսի 7%-ը նախատեսված է կառուցապատման՝ շենքերի, շինությունների և ատրակցիոն սարքավորումների, ջրային մակերեսների համար, 23%-ը՝ ճանապարհների, արահետների և ավտոկայանատեղիների համար, մնացյալ 70%-ը՝ կանաչ գոտիների համար:

Ժամանցի համալիրը կառուցվելու է շինություններից զուրկ հողատարածքում, որը նախկինում եղել է այգի, և առանձին հատվածներում ծառաթփատեսակներ և պտղատու ծառեր կան, որոնք, համաձայն նախնական գնահատման հայտի, շինարարության առաջին փուլում չեն հատվելու, իսկ 2-րդ և 3-րդ փուլերում տարածքը մաքրվելու է ծերացած ու չորացած ծառերից:

Այս տարվա սեպտեմբերին նախատեսում է բացել այգին մինչև 12 տարեկան երեխաների և նրանց ընտանիքների համար: Այն ընդգրկելու է 800 քմ տարածք զբաղեցնող խաղահրապարակ, 15 մանկական և ընտանեկան ատրակցիոններ, տեսախաղեր, սննդի կենտրոն, խաղալիքների և քաղցրավենիքների խանութներ և այլն:

2020թ. ապրիլին կկառուցվի բացօթյա տարածքի գլխավոր մասը՝ 20 ընտանիքների համար՝ սրճարան-ռեստորան դեպի լիճ բացվող տեսարանով, հարյուրավոր ծառերով շրջապատված մի քանի էքստրեմալ ատրակցիոնով, արհեստական լճով և երեխաների համար նախատեսված ինտերակտիվ շատրվանով:

2021թ. ապրիլին կկատարվի այգու ամբողջականացումը: Կավելանան մի շարք էքստրեմալ ատրակցիոններ: Այգու կենտրոնական հրապարակում կբացվեն պարող շատրվաններ՝ երկու կողմերից համալրված դեկորատիվ ջրվեժներով:

Շինարարության ավարտից հետո տարածքը կանաչապատվելու է, տնկվելու են ծաղիկներ, դեկորատիվ ծառեր:

Կենտրոնն ունենալու է 350 նոր աշխատատեղ, ստեղծվելու է հաշմանդամություն և կենսագործունեության սահմանափակումներ ունեցող մարդկանց առանց խոչընդոտների զվարճանալու, հատուկ դպրոցների սաների և անապահով ընտանիքների մանկատան երեխաների համար ատրակցիոններից անվճար օգտվելու հնարավորություններ:

Գործելու է նաև քաղաքի մի քանի կետերից անվճար փոխադրման ծառայություն դեպի «Երևան պարկ»:

Բնապահպանության նախարությունը փորձագիտական եզրակացության մեջ նշել է, որ նախատեսվող գործունեությունն ունի սոցիալական դրական ազդեցություն:

Փորձաքննական մի քանի պահանջներ է առաջադրել, մասնավորապես՝ ծերացած և չոր ծառերի հատումը կատարել քաղաքապետարանի վարչության կողմից տրված մասնագիտական եզրակացության հիման վրա:

Նախագծի իրականացումը ընկերությունը գնահատել է 22 մլն դոլար:

Մեկնաբանություններ (3)

Գևորգ
Նորեն զվարճավա՜յր։ Արդյոք շատ չենք տարվում զվարճանալով, կամ արդյոք քիչ էին եղածները Երևանում։ Առանց մրցույթի ահռելի տարածք է տրվում Թուշիկյանին, այդ որ ծրագրով, ում մտահղացմամբ։ Այսինքն ակնհայտ է, որ մարդը ինքն է աչք դրել այդ տարածքի վրա և ինքն էլ պլանավորել է քաղաքի ,,զարգացման,, տվյալ նախագիծը։ Հետո խոսել է հարկավոր ,,մեծավորների,, հետ ու ,,դաբրո,, ստացել։ Էհ եղա՞վ եղբայր։ Բա մեր ճարտարապետները, բա պետական ,,տեսլականն ու հայեցակա՞րգը,, Ի՞նչը փոխվեց այս երկրոմ։ Իսկ եթե մեկն ասեր ֊ չէ հարգելի Թուշիկյան ջան, նոր քեֆատեղերի կարիքը առայժմ չկա։ Ավելի լավ կլինի, խոսքի, այսինչ մարզի այնինչ գյուղում չիր ու կոմպոտի մի պստիկ զավոդ սարքես։ Էսօրվա դրությամբ սա է կարևորը, ախպեր ջան, ուզում ես սարքել, խնդրեմ։ Չէ, ուրեմն երթաս բարով։ Համ էլ ... էդ 22 լիմոնը քեզ որտեղի՞ց, ամոթ չլինի հարցնելը։
Հրաչ Հարությունյան
Ծրագիրը լավն է, միայն համաձայն չեմ տարածքում ռեստորանի առկայությանը: Պատկերացրեք՝ ընտանիքով զբոսնում ես ու մեկ էլ հանդիպում ես ռեստորանից դուրս եկող գինովցած/մեղմ ասած/ մարդկանց:
Huh?
On private land, by a private businessman, assuming the risk for the project. Need to stop this soviet mentality of "everyone's land".

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։