HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Ազգային ժողովն ընդունեց կառավարության ծրագիրը

Ազգային ժողովը ձայների 82 կողմ, 37 դեմ հարաբերակցությամբ hաստատեց կառավարության ծրագրի նախագիծը: Քվեարկության ժամանակ, կոճակների խնդիր առաջացավ և ԱԺ նախագահ Արարատ Միրզոյանը նշեց, որ քարտուղարությունը արձանագրության մեջ կավելացնի մնացած ձայները: Ընդհանուր առմամբ՝ գրանցված էր 128 պատգամավոր:

Հիշեցնենք՝ խորհրդարանում կառավարության ծրագրի քննարկումը մեկնարկել էր փետրվարի 12-ին:

Այսքանով, Ազգային ժողովն ավարտեց առաջին նստաշրջանի աշխատանքը: Խորհրդարանի երկրորդ նստաշրջանի առաջին նիստը տեղի կունենա մարտի 5-ին:

Քվեարկությունից առաջ եզրափակիչ ելույթով հանդես եկավ վարչապետ Նիկոլ Փաշինյանը, որը արձագանքեց մտքերի փոխանակման ընթացքում ընդդիմադիր պատգամավորների ուշագրավ խոսքերին: Վարչապետը պարզաբանեց նաև նախորդ օրերին իր հնչեցրած մի շարք հայտարարություններ, որոնք մեծ քննարկման առիթ էին:

Կառավարության ղեկավարը հասցրեց պատմական էքսկուրս կատարել՝ համեմատականներ անցկացնելով Պապ թագավորի օրոք և գործող իշխանության օրոք տարվող քաղաքականությունների միջև՝ ևս մեկ անգամ վերահաստատելով իր այն մոտեցումը, որ տնտեսական հեղափոխության շարժիչ ուժը ՀՀ քաղաքացին է, և բացի կառավարությունից յուրաքանչյուր քաղաքացի ունի անելիքի իր բաժինը:

Թարմացում, 17:20. Ազգային ժողովի պաշտոնական կայքում տեղադրված նիստի արձանագրությունից տեղեկանում ենք, որ կառավարության ծրագիրն ընդունվել է 88 կողմ, 40 դեմ, 0 ձեռնպահ ձայների հարաբերակցությամբ: Նիստի ընթացքում կոճակների հետ կապված խնդրի պատճառով՝ ցուցատախտակը ցույց էր տվել 82 կողմ, 37 դեմ, 0 ձեռնպահ հարաբերակցությունը:

Արձանագրությունից հայտնի է դառնում, որ «Իմ քայլը» խմբակցության բոլոր 88 պատգամավորները կողմ են քվեարկել նախագծին, «Լուսավոր Հայաստան» խմբակցության բոլոր 18 պատգամավորները՝ դեմ: «Բարգավաճ Հայաստան» խմբակցության՝ նիստին ներկա 22 պատգամավորները նույնպես դեմ են քվեարկել, ԲՀԿ-ի մյուս 4 պատգամավորները՝ Գագիկ Ծառուկյանը, Միքայել Մելքումյանը, Արթուր Գրիգորյանը և Դավիթ Մանուկյանը, բացակայել են նիստից և չեն մասնակցել քվեարկությանը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter