«Սասնա ծռեր» խմբի գործով դատական նիստը քննվում է դռնփակ: Նախորդ դատական նիստի ընթացքում տեղի ունեցած հերթական միջադեպից հետո, երբ դատարանում լարված իրավիճակ էր ստեղծվել, դատավոր Մեսրոպ Մակյանը որոշել է դռնփակ անցկացնել նիստն ու դրա հրապարակայնությունն ապահովելու համար դահլիճում թույլատրել միայն լրագրողների ներկայությունը:

Շենգավիթ վարչական շրջանի ընդհանուր իրավասության դատարանը

«Սասնա ծռեր»-ի համակիրները դատարանի դիմաց են. նրանք պաստառներ պարզած՝ բողոքի ակցիա են իրականացնում՝ պահանջելով, որ նիստը դռնբաց քննելու որոշում կայացվի, արդար դատաքննություն իրականացվի եւ ազատություն շնորհվի խմբի անդամներին:

Նշենք, որ նախորդ դատական նիստին, երբ հարցաքննվում էր գործով տուժող, Շենգավիթի նախկին ոստիկանապետ Արամ Հովհաննիսյանը, վիճաբանություն տեղի ունեցավ վերջինիս և խմբի անդամների, ինչպես նաև ապակիներից այն կողմ գտնվող անձանց միջև: Դրանից հետո դատավորը որոշեց դռնփակ քննել գործը:

«Սասնա ծռեր»-ի համակիրները դատարանի դիմաց բողոքի ակցիա են իրականացնում

Հիշեցնենք, որ այս գործի քննության ընթացքում դատավորը ևս մեկ անգամ նիստը դռնփակ քննելու որոշում էր կայացրել, բայց վերանայել էր իր որոշումն ու քաղաքացիներին թույլատրել ներկա գտնվել գործի քննությանը: