Խորհրդարանում ընթանում է Ազգային ժողովի կանոնակարգ-օրենքով նախատեսված ԱԺ-Կառավարություն հարցուպատասխանը: «Իմ քայլը» խմբակցության պատգամավոր Նարեկ Մկրտչյանը անդրադարձավ զինվորական պարտականությունները կատարելիս հիվանդություն, խեղում կամ վնասվածք ստացած զինվորներին հաշմանդամության կարգ տրամադրելու հարցին:

«Ովքեր նման խնդիրներ ունեն հաճախ դժգոհում են բժշկասոցիալական հանձնաժողովներից, որոնք երբեմն հաշմանդամության խումբ տրամադրելիս առաջնորդվում են սուբյեկտիվ մոտեցումներով: Օրինակ իմ ձեռքում Արմավիրի մարզի Մյասնիկյան համայնքի բնակիչ Գագիկ Աբգարյանի փաստաթղթերն են, համաձայն որոնց՝ 2013 թվականի հոկտեմբերին զինվորներին տեղափոխող մեքենան շուռ է եկել, և զինվորը ստացել է ծանր գլխուղեղային վնասվածքներ, կրծքավանդակի և թոքերի սալջարդ: Նույն թվականին դիմել է հաշմանդամության կարգ ստանալու համար»,- ասաց պատգամավորը՝ նկատելով, որ նախկին զինվորին հաշմանդամության կարգ է տրամադրվել միայն դիմելուց չորս տարի անց:

Պատգամավորի խոսքով՝ զինվորը նույն խնդիրն ունեցել է դեռևս չորս տարի առաջ, սակայն չի կարողացել օգտվել զինհաշմանդամության կարգի տրամադրող օգնություններից:

«Կարո՞ղ ենք վստահ լինել, որ այս վատ պրակտիկան անցյալում է, և հնարավո՞ր է արդյոք, որ զինվորի ընտանիքը դիմի նոր փորձաքննության»,- հարցրեց Մկրտչյանը:

Հարցին պատասխանեց աշխատանքի և սոցիալական հարցերի նախարար Զարուհի Բաթոյանը:

«Դեռևս 2018-ի վերջին ստեղծվել է անկախ հանձնաժողով նախարարության կազմում, որը երրորդ օղակն է բժշկասոցիալական փորձաքննական հանձնաժողովի որոշումները քննելու իմաստով, և սա մեզ թույլ է տալիս որոշումները ևս մեկ անգամ քննելու: Այս իմաստով քաղաքացիները կարող են դիմել նաև այս օղակին, իհարկե վերանայման դեպքում կտանք համապատասխան ցուցումներ»,- ասաց նախարարը:

Զարուհի Բաթոյանը նաև տեղեկացրեց, որ հաշմանդամության գնահատման համակարգը վերանայման կարիք ունի, նոր մոդելի ներդրումը նախարարության առաջնահերթ խնդիրներից է:

«Մարդու կարիքի վրա հիմնված նոր ծառայությունների մատուցում է լինելու»,- ասաց նա: