HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Օպերային հարակից սրճարանների ապամոնտաժում. քաղաքապետարանն ու սրճարանների աշխատակիցները կբանակցեն

Երևանի քաղաքապետարանն այսօր սկսել է Օպերայի և բալետի ազգային ակադեմիական թատրոնի շենքին հարակից սրճարանների ապամոնտաժումը: Դրանց շարքում են «Ատլանտիս Գարդեն» ՍՊԸ-ին և «Համանվագ» ՍՊԸ-ին պատկանող սրճարանները: Քաղաքապատերանի աշխատակիցների գործողություններին փորձում էին ընդդիմանալ սրճարանի աշխատողները՝ կազմակերպելով բողոքի ակցիա: Քաղաքապետարանի ներկայացուցիչ Արամ Մարտիրոսյանը լրագրողների հետ զրույցում նշեց, որ «Ատլանտիս Գարդեն»-ը ոչ մի իրավունք չունի այդ տարածքի նկատմամբ և քաղաքապետարանի գործողությունները օրենքի սահմաններում են:

«Տարածքը պատկանել է «Կենտրոն կանաչապատում» ՓԲԸ-ին, որը ենթավարձակալության իրավունքով փոխանցված է եղել «Ատլանտիս Գարդեն»-ին: «Կենտրոն կանաչապատում» ՓԲԸ-ի իրավունքները օրենքով սահմանված կարգով դադարեցվել են, և դրա մասին գրանցվել է Կադաստրի կոմիտեում և դադարեցվել է նաև ենթավարձակալության իրավունքը»,- նշեց Մարտիրոսյանը:

Ապամոնտաժման տակ հայտնված մյուս սրճարանի «Շոկոլադնիցա»-ի մենեջեր Լաերտ Պողոսյանը նշեց, որ շատ դժգոհ են քաղաքապետարանի որոշումից, քանի որ հարյուրավոր մարդիկ դառնալու են գործազուրկ:

«Մեկ ամիս առաջ քաղաքապետն ու վարչապետը գնացին հյուրանոցի բացմանը՝ 50 աշխատատեղով, իսկ հիմա 300 աշխատատեղ փակելուց ոչ վարչապետն է էստեղ, ոչ էլ քաղաքապետը: Մենք մինչև 2026 թվականը վարձակալության պայմանագիր ենք ունեցել: Չեմ հասկանում՝ ում էր խանգարում, ոնց նայում ենք, տարածքները լավ էլ կանաչապատված են»,- ասաց Լաերտ Պողոսյանը:

Լրագրողները հետաքրքրվեցին, թե քաղաքապետարանի կողմից փոխզիջումային տարբերակ առաջարկվե՞լ է, օրինակ՝ գործունեությունն այլ տարածքում շարունակելու, հարցին «Շոկոլադնիցա»-ի մենեջերը բացասական պատասխան տվեց: Ըստ Լաերտ Պողոսյանի՝ միայն «Շոկոլադնիցա»-ն 60 աշխատակից ունի, իսկ տարածքը կազմում է 200 քառ. մետր:

«Եթե քաղաքապետը ուզում ա կանաչապատի, թող գնա Հյուսիսային պողոտայում իր տան շրջակայքը կանաչապատի»,- վրդովվում է Լաերտ Պողոսյանը:

Կենտրոն վարչական շրջանի ղեկավար Վիկտոր Մնացականյանը հայտնեց, որ «Ատլանտիս Գարդեն» ՍՊԸ-ն իր ամբողջ տարածքը վարձակալել է ընդամենը 90 հազար դրամով՝ շեշտելով, որ ներկայիս շուկայական գների պայմաններում դա չտեսնված ցածր թիվ է: 

Վիկտոր Մնացականյանն ասաց, որ Օպերայի տարածքին ոչ անմիջականորեն հարող սրճարանները դեռևս մի քանի տարի կշարունակեն աշխատել, իսկ ապամոնտաժման առաջին փուլում արդեն կան դատական գործեր: Վիկտոր Մնացականյանը հայտարարեց, որ այն սրճարանների համար, որոնք մայրաքաղաքում չունեն իրենց երկրորդ մասնաճյուղը, քաղաքապետարանը կքննարկի նրանց այլ տարածք հատկացնելու հարցը:

«Մեր գործողություններով մենք կոչ ենք անում քաղաքացիներին գնալ և օգտվել այգիներից: Երևանի բնակչության միայն 10 տոկոսն է այգի գնում, բայց թող տպավորություն չստեղծվի, թե մենք ամբողջ պատասխանատվությունը գցում ենք սրճարանների և նրանց սեփականատերերի վրա»,- նշեց վարչական շրջանի ղեկավարը:

Վիկտոր Մնացականյանն առանձնահատուկ շեշտեց «Շոկոլադնիցա»-ի սրճարանի շուրջ ստեղծված իրավիճակը:

«Չգիտեմ ոնց՝ ստացել են տարածքի սեփականության իրավունքը, ոչ թե հողի, այլ ընդհանրապես շինության, զարմանում եմ՝ ոնց կարելի էր Օպերայի մոտ այդպիսի բան թույլ տալ: Արդեն դատական հայց կա: Էլ չասեմ՝ տեսնում եք նրանց գործունեությունը, և՛ երաժշտությունը, և՛ ընդհանրապես գեղագիտական տեսքը՝ չեն համապաստախանում մեր պատկերացրած Երևանին»,- ասաց Վիկտոր Մնացականյանը:

Երևանի աղաքապետարանի մամուլի խոսնակ Հակոբ Կարապետյանն էլ լրագրողների հետ զրույցում ասաց, որ քաղաքապետարանը դեռ 2018-ի դեկտեմբերի 13-ին ծանուցումներ է ուղարկել Օպերայի հարակից տարածքում վարձակալության իրավունքով գործունեություն ծավալող 5 տնտեսվարողի, որ համաձայն պայմանագրի՝ երեսնօրյա ժամկետում դադարելու է վարձակալության պայմանագրի գործողությունը։ Կադաստրի կոմիտեն 30-օրյա ժամկետը լրանալուց հետո քաղաքապետարանի հարցման հիման վրա՝ դադարեցրել է վարձակալության իրավունքը։ Այնուհետեւ քաղաքապետարանը փետրվարի 13-ին ծանուցումներ է ուղարկել արդեն նախկին վարձակալներին՝ առաջարկելով ողջամիտ ժամկետում մաքրել տարածքն իրենց գույքից, այդ թվում՝ ինքնակամ կառույցներից։

«Ողջամիտ ժամկետը անցել է: Սա անսպասելի չէր կարող լինել: Բոլոր իրավական ակտերով բխող գործողությունները քաղաքապետարանի կողմից արվել են: Բոլոր ծանուցումները ժամանակին ուղարկվել են թե՛ տարածքը ազատելու, թե՛ գույքը մաքրելու և ինքնակամ կառույցները ապամոնտաժելու վերաբերյալ: Քաղաքապետարանը շատ ուարխ կլիներ, որ տնտեսվարողները արդեն արած լինեին դա»,- նշեց մամուլի խոսնակը:

Հակոբ Կարապետյանի խոսքով՝ Հովհաննես Թումանյանի արձանի աջ անկյունից մինչև Ալեքսանդր Սպենդիարյանի արձանի ձախ անկյուն ընկած տարածքը մոտակա օրերին կանաչապատվելու է, իսկ մյուս տարի այդ տարածքի համար կանցկացվի բաց մրցույթ և կորոշվի այդտեղի ճարտարապետական դիմագիծը: 

Այնուհետև Հակոբ Կարապետյանի հետ բանավեճի բռնվեց «Շոկոլադնիցա»-ի մենեջեր Լաերտ Պողոսյանը՝ նշելով, որ քաղաքապետարանն իրավունք չունի նմնանատիպ գործողություններ իրականացնել, ինչին ի պատասխան՝ Հակոբ Կարապետյանն էլ ասաց, որ ընկերությունն էլ շինությունը կառուցելու և տարածքում գտնվող ծառը խոհանոցի միջով բարձրացնելու իրավունք չուներ:

Երևանի ավագանու «Լույս» խմբակցության անդամ Անի Խաչատրյանի, Կենտրոն վարչական շրջանի ղեկավար Վիկտոր Մնացականյանի՝ սրճարանների աշխատակիցների հետ զրույցներից հետո որոշվեց նրանց հրավիրել քաղաքապետարան՝ բանակցությունների:

«Աշխատակիցների հետ կքննարկենք, հասկանանք, թե ինչ են ուզում մեզնից, որովհետև իրենք մի ամսից ավել ժամանակ են ունեցել տարածքներն ազատելու համար: Այսօր ապամոնտաժումը կդադարեցվի, սակայն դա չի նշանակվում, որ քաղաքապետարանը հրաժարվում է Օպերայի հարակից տարածքները կանաչապատելու մտքից, կքննարկենք, կտեսնենք»,- ասաց Վիկտոր Մնացականյանը:

Կենտրոն վարչական շրջանի ղեկավարը նշեց, որ սրճարանների աշխատակիցների հետ հանդիպումը քաղաքապետարանում կմեկնարկի այսօր՝ 18:00-ին, արդյունքների մասին լրացուցիչ տեղեկատվություն կհաղորդվի:

Հիշեցնենք, որ դեռևս 2019-ի հունվարին քաղաքապետարանը հայտարարել էր, որ Օպերայի մերձակայքում՝ անմիջապես Ազատության հրապարակին հարող հատվածում կանաչապատում է լինելու, իսկ այդտեղ գործունեություն ծավալող սրճարանները պետք է ազատեն իրենց զբաղեցրած տարածքները:

Տեսանյութը՝ Սարո Բաղդասարյանի

Մեկնաբանություններ (3)

Carolin 2019-03-17T18:06:24+04:00
How about the illegal permits the 6th floor apartments have on top of Tamanyan's buildings on Abovyan Sayat Nova!!!!!???? They are bad for the foundation of those buildings and also an eye soar giving a shack look to the center of the capital which should look immaculate! There is a "prarab" by the name of Nunufar Hovhanissyan, who goes around getting those permits illegally through her judge relatives: Gayane Karakhanyan and Olga Hovhanissyan!!!
Nathalie (french diaspora) 2019-03-16T05:03:25+04:00
One month is very short for a company that has to close. and then from my outside look of French, Yerevan is really a city of coffee. It does not shock me at all that there is in the heart of opera. It symbolizes Armenia, the culture of hospitality! we gather and drink a coffee at the jazve!
Կարեն 2019-03-13T18:41:01+04:00
Հաջորդը պետք է լինի օղակաձև զբոսայգին և Աբովյան Սայաթ Նովա փողոցների խաչմերուկը, որը վեիածվել է աղբանոցի քաղաքի կենտրոնում, ժամանակ է եկել

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։