Երևան քաղաքի ընդհանուր իրավասության դատարանը՝ նախագահությամբ դատավոր Արմեն Բեկթաշյանի, քիչ առաջ հետաձգեց երկրորդ նախագահ Ռոբերտ Քոչարյանի խափանման միջոցի միջնորդության քննությունը: Նիստը կշարունակվի վաղը՝ մարտի 14-ին:

Լրագրողների հետ զրույցում Քոչարյանի պաշտպան Հայկ Ալումյանն ասաց, որ այսօրվա նիստի ընթացքում քննիչը ներկայացրել է իր միջնորդությունը, որին միացել են նաև մեղադրող դատախազները:

Ըստ Ալումյանի՝ միջնորդության մեջ ներկայացվել են նույն հիմքերը, ինչ նախկինում:

Պաշտպանի խոսքով՝ Ռոբերտ Քոչարյանն այսօրվա նիստին չի մասնակցել, քանի որ նպատակահարմար չի համարում:

Մամուլում տևական ժամանակ շրջանառվում են տեղեկություններ, թե Նիկոլ Փաշինյանի խորհրդական Արշակ Կարապետյանը եւ գործարար Սիլվա Համբարձումյանը ցուցմունք են տվել Քոչարյանի դեմ: Պաշտպան Ալումյանի կարծիքով՝ թե´ Համբարձումյանի, թե´ անգամ Արշակ Կարապետյանի ցուցմունքներն այնպիսին չեն, որոնց վրա կարելի էր մեղադրանք կառուցել:

Հարցին՝ ճի՞շտ են այն տեղեկությունները, որ Սերժ Սարգսյանը ցուցմունք է տվել Ռոբերտ Քոչարյանի դեմ, Ալումյանը պատասխանեց. «Սերժ Սարգսյանը Ռոբերտ Քոչարյանի դեմ ցուցմունք չի տվել: Պարոն Սարգսյանը տվել է ցուցմունք՝ գործի առնչությամբ, և այդ ցուցմունքն ամենավառ երևակայություն ունեցող անձը հազիվ թե կարողանա օգտագործել պարոն Քոչարյանի դեմ, բայց, հավանաբար այսօրվա մեր վարույթ իրականացնող մարմինը և դատախազությունը հույս են դրել, որ գործը դատարան ուղարկելուց հետո անհրաժեշտ ճնշումներ կլինեն դատավորի նկատմամբ, և այս գործն, այսպես ասած, կանցկացնեն»:

Մանրամասները՝ տեսանյութում: