Գագիկ Ծառուկյանի անվտանգության ծառայության նախկին պետ Էդուարդ Բաբայանը չի հերքում, որ 2018 թվականի հուլիսի 2-ին եղել է «Օլիմպավան» ռեստորանային համալիրում, բայց պնդում է, որ ինքը չի գտնվել այն դահլիճում, որտեղ տեղի է ունեցել մարզիկների հետ ժողովը:

Նշենք, որ ըստ Բաբայանի մեղադրանքի՝ վերջինս մարզային համալիրի դահլիճում, որտեղ ժողով է անցկացվել, հարվածել է քաղաքացի Վյաչեսլավ Հարությունովին:

«Ես չեմ մանակցել ծեծկռտուքին, չեմ եղել այդ սենյակում, Ծառուկյանի հետ բարձրացել եմ վերև, երկու հոգու ընդունել է, մոտ մեկ ժամ է տևել, հետո գնացել ենք», - լրագրողների հետ զրույցում ասաց Էդուարդ Բաբայանը:

Լրագրողի հարցին՝ ճիշտ չէ՞ տեղեկությունը, որ տուժող Հարությունովը հայհոյել է Գագիկ  Ծառուկյանին, որից հետո Բաբայանը հարվածել է նրան, պատգամավորը պատասխանեց, որ նման բան չի եղել:

Հարցին՝ ըստ Բաբայանի՝ ի՞նչ շահ ուներ տուժողը, որպեսզի հայտներ, որ իրեն հարվածել են, Բաբայանը պատասխանեց, որ չգիտի, այդ մասին տուժողին հարցնենք:

Նշենք, որ այժմ տուժող Վյաչեսլավ Հարությունովը պնդում է, թե ոտքը սայթաքել ու վայր է ընկել, ինչի հետևանքով ստացել է ծանր մարմնական վնասվածք: Լրագրողը հետաքրքրվեց, թե ըստ Բաբայանի՝ դա իրատեսակա՞ն է, ինչին ի պատասխան՝ վերջինս նշեց. «Հարգելի՛ լրագրող, ես անվտանգության պետ լինելով՝ ոչ թե մարդուն ծեծում եմ, այլ եթե մարդուն վտանգ սպառնա, կկանխեմ, բայց ոչ թե ծեծեմ, ջարդեմ, գցեմ գետնին»:

Լրագրողներից մեկը Բաբայանից խնդրեց անկեղծանալ ու ասել՝  Ծառուկյանի անվտանգության ծառայության պետ եղած տասը տարիների ընթացքում երբևէ մարդ ծեծե՞լ է:

«Ես ընդհանրապես մարդ չեմ ծեծում, ասեմ ձեզ»,- հայտարարեց Էդուարդ Բաբայանը:

Վերջինս հայտնեց, որ Վյաչեսլավ Հարությունովը որդու հետ կապված հարցով դիմել է Գագիկ Ծառուկյանին և Ծառուկյանը հանձնարարել է, որ հարցը լուծվի, քանի որ նա «չեմպիոն տղա» է: Նշենք, որ Վյաչեսլավ Հարությունովի որդու նկատմամբ հետախուզում է հայտարարված եղել՝ զինվորական ծառայության հետ կապված խնդրով:

Ըստ Էդուարդ Բաբայանի՝ Հարությունովի և Ծառուկյանի միջև խոսակցությունը տեղի է ունեցել «Օլիմպավան» մարզական համալիրի բակում: Բաբայանը նշեց նաև, որ դեպքից հետո մեկ-երկու անգամ հանդիպել է տուժող Հարությունովին,  նրա հետ որևէ խնդիր, հարց չունի:

Լրագրողների հետ զրույցում Վյաչեսլավ Հարությունովը շարունակեց պնդել, որ ինքը չի հայտնել, թե Էդուարդ Բաբայանն իրեն հարվածել է:

«Ես ոչ մի բան չեմ նշել. էդ սաղ իրանք են նշել, իրանք նշել, իրանք՝ ջնջել: Դատավարության վերջում դուք կտեսնեք, որ ճիշտը դուրս է տալու ջրի երես, ով ա գրել, խի ա ուզում իմ ու Էդոյի կամ իմ ու պարոն Ծառուկյանի մեջ տենց մի հատ եսիմ...», - ասաց Հարությունովը:

Վերջինս նշեց, որ ինքն ու Ծառուկյանն ընտանիքներով մոտ են, որ Ծառուկյանն իր որդուն «տիրություն է արել»: Մենք հարազատ մարդիկ ենք, իմ էրեխուն տիրություն ա արել պարոն  Ծառուկյանը, եկել ա, դարձել աշխարհի չեմպիոն», - ասաց Հարությունովը:

Մեր դիտարկմանը, որ իրավապահ մարմինների կողմից տարածված հայտարարությունները, որոնցում ասվում է այն մասին, որ Հարությունովին հարվածել են, չի՞ համապատասխանում իրականությանը, վերջինս պատասխանեց, թե ինչպես հստակ նշել են, այնպես էլ հստակ կհերքեն:

Լրագրողը  Հարությունովին խնդրեց մանրամասներ հայտնել՝ կապված նրա սայթաքելու հանգամանքի հետ: «Այ ցավդ տանեմ, մի տարի առաջ սայթաքել եմ, ես ի՞նչ ասեմ»,- ի պատասխան՝ ասաց Հարությունովը: Դիտարկմանը, որ մեկ տարի առաջ «սայթաքելու դեպքի առթիվ» քրեական գործ է հարուցվել, Հարությունովը պատասխանեց, թե հարուցվել է, և ամեն ինչ կընկնի իր տեղը, ամեն ինչ կպարզվի:

Հարցին՝ դեպքից հետո Գագիկ Ծառուկյանը կամ Էդուարդ Բաբայանը հորդորե՞լ են իրականությունը չհայտնել, Հարությունովը պատսխանեց. «Բայց դուք ինչո՞ւ եք մտածում, որ իրականությունը հիմա դուք եք ասում, այլ ոչ թե ես»:

Հարցին՝ քննչական մարմիններն, ըստ Հարությունովի, ինչո՞ւ են հնարել Ծառուկյանի և Բաբայանի առնչությունն իր հետ կապված միջադեպին, Հարությունովը պատասխանեց, թե հավանաբար քաղաքական խաղ են սարքել Գագիկ Ծառուկյանի գլխին:

Հարությունովը, այն հարցին, թե իրե՞ն են օգտագործել այդ խաղը սարքելիս, պատասխանեց, որ իրեն շատ դժվար է օգտագործելը: