Դատախազությունը բողոքարկել  է երկրորդ նախագահ Ռոբերտ Քոչարյանի կալանքի ժամկետը երկու ամսով երկարացնելու մասին առաջին ատյանի դատարանի որոշումը՝ հիմնավոր կասկածի բացակայության և թաքնվելու  վտանգ  չլինելու մասով: Այս մասին «Հետք»-ի  հարցին ի պատասխան ասաց Քոչարյանի պաշտպաններից Ռուբեն Սահակյանը;

 Նշենք, որ դատավոր Արմեն Բեկթաշյանը, քննելով Քոչարյանի կալանքի ժամկետը երկարացնելու վերաբերյալ Հատուկ քննչական ծառայության միջնորդությունը, նրան կալանավորելու որոշում էր կայացրել, բայց գտել, որ նրան վերագրվող կաշառքի դրվագում հիմնավոր կասկած առկա չէ: Բացի այդ՝ դատարանը նաև գտել էր, որ առկա չէ Քոչարյանի թաքնվելու վտանգ: Քոչարյանի պաշտպանական  թիմն  ավելի վաղ հայտնել է, որ իրենց կողմից ևս բողոքարկվել է առաջին ատյանի դատարանի որոշումը:

Հիշեցնենք, որ Քոչարյանի կալանքի ժամկետը երկու ամսով երկարացնելու վերաբերյալ որոշումը դատարանը հրապարակել էր Փետրվարի 15-ին:

Քոչարյանը մեղադրվում է Քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ մասով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու մեջ: Նրա, ինչպես նաև «Մարտի 1-ի գործով» մեղադրյալներ Արմեն Գևորգյանի, Յուրի Խաչատուրովի և Սեյրան Օհանյանի վերաբերյալ գործով նախաքննությունն ավարտվել է և պաշտպաններին ժամանակ է տրամադրվել՝ գործի նյութերին ծանոթանալու համար: