Երևան քաղաքի ընդհանուր իրավասության դատարանում՝ նախագահությամբ դատավոր Աիդա Դավթյանի, այսօր տեղի ունեցավ երկրորդ նախագահ Ռոբերտ Քոչարյանի որդու` Սեդրակ Քոչայանն ընդդեմ ԱԱԾ տնօրեն Արթուր Վանեցյանի գործով դատական նիստ:  Հիշեցնենք, որ հայցը ներկայացվել է «Կոնգրես» հյուրանոցի մասին խոսելիս Քոչարյանների հասցեին Վանեցյանի ասած արտահայտությունների համար:

«Ռոբերտ Քոչարյանի ընտանիքի ունեցվածքի մասին, որ ինքը հեռուստատեսությամբ ասում է՝ մենք ոչինչ չունենք, փաստորեն կխոսենք և կհրապարակենք, թե ով ինչ ունի և ոնց է ձեռք բերել, ոնց է ձեռք բերել «Կոնգրես» հյուրանոցը 6 մլն դոլար կաշառք ձեռք բերելու արդյունքում և մնացած այլ-այլ ունեցվածքը: Բաժնետերերի մեջ չի նշանակում, որ պետք է մարդուն ստիպել, որ 6 մլն դոլար փող տա իրենց, իրանք էլ վերցնեն, տանեն: Ձեզ կտա՞ն 6 մլն դոլար հենց ընենց, ո՞ր մեկին կտան: Էդ ունեցվածքի հետ կապված՝ թե որտեղից է եղել, ապօրինի հարստացումը, իրենց չի սպառնում, որովհետև ապօրինի հարստացում չկա, փողերի լվացման համար է հարուցվել քրեական գործ»,- ասել է Արթուր Վանեցյանը:

Դատավոր Աիդա Դավթյանն այսօրվա նիստին  քննարկման առարկա դարձրեց Արթուր Վանեցյանի՝ գործով ոչ պատշաճ պատասխանող լինելու հարցը և առաջարկեց ոչ պատշաճ պատասխանողին պատշաճ պատասխանողով փոխարինել:

«Դատարանը գործի քննության ընթացքում, պարզելով, որ հայցը հարուցված է ոչ այն անձի դեմ, ով պետք է պատասխանի սույն հայցով, ղեկավարվելով քաղաքացիական դատավարության օրենսգրքի 172 հոդվածով, նկատի ունենալով, որ հենց հայցվորն է  հայցադիմումում նշել, որ Հայաստանի Հանրապետության ազգային անվտանգության տնօրենն ասուլիս է տվել սեպտեմբերի 11-ին և այլն, ուզում եմ հայցվորի համաձայնությունը ստանալուց հետո ոչ պատշաճ պատասխանողին փոխարինել պատշաճ պատասխանողով»,- ասաց դատավորը:

Նշենք, որ Վանեցյանի`գործով ոչ պատշաճ պատասխանող լինելու հարցը այս գործով առաջին նախնական դատական նիստի ընթացքում բարձրացրել էր Վանեցյանի ներկայացուցիչներից Վահագն Գրիգորյանը` նշելով, որ, հայցն, ըստ էության, կարող էր լինել ընդդեմ Հայաստանի Հանրապետության: Ըստ Գրիգորյանի՝ հայցվորն իր հայցադիմումի մեջ էլ ընդունել է արտահայտությունների կատարման պահին Վանեցյանի՝ ԱԱԾ տնօրենի կարգավիճակ ունենալու հանգամանքը:

Ըստ Գրիգորյանի՝ քաղաքացուն պետական մարմինների կամ պաշտոնատար անձանց ապօրինի գործողություններով պատճառված վնասը հատուցում է Հայաստանի Հանրապետությունը:

Սեդրակ Քոչարյանի ներկայացուցիչ Անի Ալավերդյանը, սակայն այսօր պնդեց, որ Արթուր Վանեցյան ֆիզիկական անձը գործով պատշաճ պատասխանող է, և հանգամանքը, որ հայցում նրա անվան դիմաց գրված է ԱԱԾ տնօրեն, նրան նույնականացնելու համար է:

Նշենք, որ Վանեցյանը լրագրողների հետ զրույցում արած իր հայտարարությունից հետո պարզաբանել է, որ էմոցիոնալ հայտարարություն է արել, առաջին անգամ խոսել է ոչ թե փաստերով, այլ էմոցիաներով, խոսքը շատ ճիշտ չէ ձևակերպել:

Քոչարյանի ներկայացուցիչ Անի Ալավերդյանն այսօր մեջբերեց Վանեցյանի խոսքն այն մասին, որ ինքն, ըստ էության, արդեն հերքել է այն, ինչի համար Սեդրակ Քոչարյանը դիմել է դատարան ու հերքում է պահանջում, ապա հետաքրքրվեց, թե արդյոք Վանեցյանի խոսքը նշանակո՞ւմ է, որ նա ընդունում է հանգամանքը, որ իր արած արտահայտությունները զրպարտություն պարունակող սխալ տեղեկություններ են եղել: Հարցին ի պատասխան՝ Վանեցյանի ներկայացուցիչներից Մարիամ Զոդյանն ասաց, թե Վանեցյանն ասել է այն, ինչ ասել է, մնացած հարցերի պատասխանները դատաքննության ընթացքում կտրվեն:

Զադոյանն այսօր դատարան էր ներկայացրել գրավոր ապացույցներ թեմայի վերաբերյալ մամուլում հրապարակված հոդվածներ ու ԱԱԾ-ի կողմից տարածված մեկ հաղորդագրություն, որոնց ծանոթանալու համար Սեդրակ Քոչարյանի ներկայացուցիչները  ժամանակ խնդրեցին դատարանից: Նիստը հետաձգվեց մինչև ապրիլի 23-ը:

Նշենք, որ ներկայացված հայցից որոշ ժամանակ անց Սեդրակ Քոչարյանը «Կոնգրես» հյուրանոցի գործով ներգրավվել է որպես մեղադրյալ փողերի լվացման և հարկեր չվճարելու համապատասխան հոդվածներով: