Հանրային հեռուստառադիոընկերության խորհրդի նիստում Գարեգին Խումարյանն ընտրվել է Հանրային ռադիոընկերության գործադիր տնօրենն: Այս մասին հաղորդում է Հանրային ռադիոյի կայքը: 

Գարեգին Խումարյանը ստացել է 2 ձայն, Հռիփսիմե Առաքելյանը, Տիգրան Հարությունյանն ու Գրիգոր Նազարյանը՝ 1-ական:

Հանրային հեռուստառադիոընկերության խորհրդը նաև հայտարարություն է տարածել, որում ասվում է.

«Այսօր՝ 2019 թվականի ապրիլի 3-ին, Հանրային հեռուստառադիոընկերության խորհրդի կողմից ձևավորված «Հայաստանի հանրային ռադիոընկերություն» փակ բաժնետիրական ընկերության գործադիր տնօրենի թափուր պաշտոնի համալրման համար մրցույթի կազմակերպման և անցկացման ժամանակավոր հանձնաժողովը ամփոփեց «Հայաստանի հանրային ռադիոընկերություն» ՓԲ ընկերության տնօրենի թափուր տեղի համալրման համար հայտարարված մրցույթի արդյունքները:

Հանձնաժողովն ուսումնասիրելով մրցույթին մասնակցության հայտ ներկայացրած 30 թեկնածուների հայեցակարգերը, առանձնացրել և հարցազրույցի էր հրավիրել 29 մասնակցի:

Հարցազրույցներից հետո հանձնաժողովի անդամները փակ քվեարկությամբ ընտրեցին «Հայաստանի հանրային ռադիոընկերություն» ՓԲ ընկերության տնօրենին:

Հանձնաժողովը ղեկավարվելով Հանրային հեռուստառադիոընկերության խորհրդի 2010 թ.‑ի սեպտեմբերի 6-ի № 50-Լ որոշմամբ հաստատված «Հայաստանի հանրային հեռուստաընկերություն», «Հայաստանի հանրային ռադիոընկերություն», «Շիրակի հանրային հեռուստառադիո» և «Հոգևոր-մշակութային հանրային հեռուստաընկերություն» փակ բաժնետիրական ընկերությունների գործադիր տնօրենների թափուր տեղերի մրցույթի անցկացման կարգի 2.14 կետի պահանջներով, որոշում է կայացրել մրցույթում հաղթող ճանաչել քվեարկության արդյունքում առավելագույն ձայներ հավաքած Գարեգին Կորյունի Խումարյանին»:

Հիշեցնենք՝ Հանրային ռադիոընկերության գործադիր տնօրենի պաշտոնը թափուր էր մնացել 2018թ. դեկտեմբերի 19-ից հետո, երբ Մարկ Գրիգորյանը, սեփական դիմումի համաձայն, ազատվել էր այդ պաշտոնից: