Վերաքննիչ քրեական դատարանը, նախագահությամբ դատավոր Լուսինե Աբգարյանի, քիչ առաջ սկսեց Մանվել Գրիգորյանի խափանման միջոց կալանքի ժամկետը երկու ամսով երկարացնելու որոշման դեմ նրա պաշտպանների բողոքի քննությունը:

Նշենք, որ Գրիգորյանի կալանքի ժամկետը երկարացվել է մարտ ամսին: Մինչ այս Գրիգորյանի խափանման միջոցի վերաբերյալ բողոքները մակագրվում էին Վերաքննիչ քրեական դատարանի դատավոր Արսեն Նիկողոսյանին, և առաջին անգամ է, որ բողոքը պետք է քննի այլ դատավոր:

Նշենք, որ առաջին ատյանի դատարանում, նախագահությամբ դատավոր Մարինե Մելքոնյանի, քննվում է նաև Գրիգորյանի կալանքը գրավով փոխարինելու վերաբերյալ նրա պաշտպանների միջնորդությունը: Գրավի գործով մեկ դատական նիստ է նշանակվել, որը հետաձգվել է դատավորի՝ այլ գործով խորհրդակցական սենյակում լինելու պատճառով: Պաշտպանների խոսքով, առ այսօր նիստ չի նշանակվել:

Հիշեցնենք, որ Մանվել Գրիգորյանը մեղադրվում է ապօրինի կերպով զենք-զինամթերք պահելու, 101.232.917 դրամի գույք յուրացնելու, 1.228.176.342 դրամի հարկերի վճարումից խուսափելու, պետական միջոցներից 1.225.003.300 դրամ վատնելու եւ շորթմամբ 37․101․100 դրամ արժողությամբ գույքի հափշտակությունը կազմակերպելու մեջ: Նրա, ինչպես նաև կնոջ՝ Նազիկ Ամիրյանի վերաբերյալ քրեական գործով նախաքննությունն ավարտվել է: