Վերաքննիչ քրեական դատարանում՝ դատավոր Ռուզաննա Բարսեղյանի նախագահությամբ, այսօր շարունակվում է երկրորդ նախագահ Ռոբերտ Քոչարյանի խափանման միջոցի գործով բողոքների քննությունը:

Հիշեցնենք, որ Քոչարյանի պաշտպանները բողոքարկում են նրա կալանքի ժամկետը երրորդ անգամ երկարացնելու և իրենց ներկայացրած գրավի միջնորդությունը մերժելու վերաբերյալ առաջին ատյանի դատարանի որոշումը: Դատախազությունն էլ բողոք է ներկայացրել որոշման դեմ՝ նրան վերագրվող կաշառքի հոդվածում հիմնավոր կասկածի բացակայության և թաքնվելու վտանգ չլինելու մասով:

Բողոքների քննությունը սկսվել է երեկ: Դատական նիստի ընթացքում դատախազությունն ավարտել է բողոքի  ներկայացումը, իսկ Քոչարյանի պաշտպաններից Հայկ Ալումյանը հասցրել է ներկայացնել միայն իր բողոքի մի մասը:

Քոչարյանն ինչպես երեկ, այնպես էլ այսօր, ներկա է նիստին:

Նշենք, որ դատավոր Արմեն Բեկթաշյանը, քննելով Քոչարյանի կալանքի ժամկետը երկարացնելու վերաբերյալ Հատուկ քննչական ծառայության միջնորդությունը, փետրվարի 15-ին նրան կալանավորելու որոշում էր կայացրել, բայց գտել, որ նրան վերագրվող կաշառքի դրվագում հիմնավոր կասկած առկա չէ: Բացի այդ, դատարանը նաև գտել էր, որ առկա չէ Քոչարյանի թաքնվելու վտանգ:

Երկրորդ նախագահը մեղադրվում է Քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ մասով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու մեջ: Նրա, ինչպես նաև «Մարտի 1-ի գործով» մեղադրյալներ Արմեն Գևորգյանի, Յուրի Խաչատուրովի և Սեյրան Օհանյանի վերաբերյալ գործով նախաքննությունն ավարտվել է և պաշտպաններին ժամանակ է տրամադրվել գործի նյութերին ծանոթանալու համար: