Վերաքննիչ քրեական դատարանը, նախագահությամբ դատավոր Ռուբիկ Մխիթարյանի, այսօր բեկանեց առաջին ատյանի դատարանի որոշումը երեք անչափահաս երեխաների մայր Հասմիկ Սարգսյանի վերաբերյալ և վարույթն իրականացնող մարմնին պարտավորեցրեց վերացնել նրա իրավունքների խախտումները:

Սարգսյանի պաշտպանները վիճարկում էին նրա նկատմամբ ենթադրյալ ապօրինի գործողությունների առթիվ հարուցված քրեական գործի շրջանակներում ոստիկանների և քննիչի նկատմամբ քրեական հետապնդում չիրականացնելու, քրեական գործի վարույթը կարճելու որոշման դեմ իրենց բողոքը մերժելու մասին առաջին ատյանի դատարանի դատական ակտը:

Նշենք, որ Հասմիկ Սարգսյանն իր նկատմամբ ապօրինությունների մասին բարձրաձայնել է այդ գործողություններից շուրջ 9 ամիս անց, այն ժամանակ, երբ արդեն մեղավոր էր ճանաչվել իրեն վերագրվող գողության գործի շրջանակներում:

Սարգսյանը մեղավոր է ճանաչվել և դատապարտվել 10 000 դրամի գողության համար: Ոստիկանների և քննիչի վերաբերյալ հանցագործության մասին հաղորդում տալիս Սարգսյանն ասել և այժմ էլ պնդում է, որ ոչ թե 10000, այլ 4000 դրամ է գողացել: Ըստ Սարգսյանի՝ 10 000 դրամի գողության վերաբերյալ ցուցմունք է տվել ոստիկանության Սիսիանի բաժնում իր նկատմամբ հնչեցված սպառնալիքների ներքո:

Նշենք, որ եթե Հասմիկ Սարգսյանին վերագրվող գողոնի չափը 4000 դրամ լիներ, ապա վերջինիս նկատմամբ քրեական հետապնդում չէր կարող իրականացվել, քանի որ նրան վերագրվող հոդվածով անձը ենթակա է քրեական պատասխանատվության, եթե գողոնի արժեքը 5000 դրամ և ավելի է:

Օրեր առաջ գողության գործի շրջանակներում Վճռաբեկ դատարանը որոշում է կայացրել ու Սարգսյանին դատապարտել 2 տարի ժամկետով պայմանական ազատազրկման:

Վերաքննիչ դատարանում քննված գործի և առաջին ատյանի դատարանի որոշման մանրամասները կներկայացնենք քիչ ուշ: