Նախագահ Արմեն Սարգսյանը ստորագրել է խորհրդարանի՝ դեռևս նախորդ տարվա հոկտեմբերի 2-ին ընդունած ԱԺ կանոնակարգ-օրենքում լրացումներ ու փոփոխություններ կատարելու մասին օրենքը: Այս օրենքում փոփոխություններ կատարել էր դեռևս նախորդ գումարման խորհրդարանը, կողմ էին քվեարկել ՀՀԿ, ԲՀԿ, ՀՅԴ խմբակցությունները, դեմ՝ «Ելք»-ը:

Սա հենց այն նախագիծն էր, որի քննարկման ժամանակ վարչապետ Նիկոլ Փաշինյանն իր ֆեյսբուքյան ուղիղ եթերով կոչ արեց քաղաքացիներին խորհրդարանի մոտ հավաքվել, քանի որ խորհրդարանական որոշ ուժեր, ըստ Փաշինյանի, հակահեղափոխական և հակասահմանադրական փոփոխություն էին պատրաստվում իրականացնել:

Հիշեցնենք, որ ըստ առաջարկվող փոփոխության` հնարավոր կլինի ընդհատել ԱԺ նիստը ֆորսմաժորային իրավիճակներում կամ այն դեպքերում, երբ խոչընդոտվում է պատգամավորների քվեարկությունը, և շարունակել այն ժամանակ, երբ խոչընդոտող հանգամանքները վերացվեն: Փաշինյանի համոզմամբ՝ ՀՀԿ-ն այս փոփոոխությունն առաջարկել էր նրա համար, որպեսզի տապալվի վարչապետի ընտրությունը, և քաղաքացիները չկարողանան շրջափակել խորհրդարանի շենքը:

Նախագահ Արմեն Սարգսյանը նախագիծն ուղարկել էր ՍԴ, որպեսզի վերջինս պարզի վիճելի նախագծի սահմանադրականության հարցը, և ահա վեց ամիս անց բարձր դատարանն այն համարել է Սահմանադրությանը համապատասխանող:

ԱԺ նախագահ Արարատ Միրզոյանը մեր հարցին ի պատասխան ասել էր՝ որպես քաղաքական գործիչ կարող է որոշակի վերաբերմունք ունենալ ՍԴ որոշման վերաբերյալ, սակայն որպես ԱԺ նախագահ չի կարող այն վիճարկել:

ԱԺ նախկին փոխխոսնակ, նախագծի համահեղինակ Արփինե Հովհաննիսյանն իր ֆեյսբուքյան էջում գրել էր, որ առաջիկայում կանդրադառնա ՍԴ որոշմանը: