HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

«Հեսա ես քո վրա ընենց կինո եմ ասելու նկարեն, որ սաղ կյանքդ հիշես». Իսրայել Սարգսյանի հայտարարությունը Վլադիմիր Գասպարյանի վերաբերյալ

Քրեական աշխարհում  «Կայարանցի Թևոս» անունով հայտնի Թևոս Սաֆարյանի եղբոր և Մովսես Ներսիսյանի  սպանության գործով 25 տարվա ազատազրկման դատապարտած Իսրայել Սարգսյանն այսօր Վերաքննիչ դատարանում նախկին ոստիկանապետ Վլադիմիր Գասպարյանի վերաբերյալ հայտարարություն արեց, որի մասին նախկինում չի խոսել:

Սարգսյանի խոսքով՝ երբ իրեն ձերբակալել են, տարել են Վովա Գասպարյանի մոտ,  ու վերջինս խոստացել է նրա մասին «նենց կինո նկարել, որ կյանքում չմոռանա»:

«Ինձ տարել էին մի սենյակ և անընդհատ հարցնում էին, թե որտե՞ղ է գտնվում Մովսեսը, ո՛չ սպանության մասին էին հարցնում, ո՛չ այլ բանի, միայն ստիպում էին ասել Մովսեսի տեղը. ես էլ ասում էի՝ չգիտեմ»,- պատմեց Իսրայել Սարգսյանը:

Նշենք, որ ըստ մեղադրանքի՝ Սարգսյանը նախ Մովսես Ներսիսյանին պատվիրել է Թևոս Սաֆարյանի եղբոր սպանությունն, ապա ինքը սպանել Մովսես Ներսիսյանին:

Սարգսյանի խոսքով՝ իր մոտ է գնացել Երևանի այն ժամանակվա ոստիկանապետ Աշոտ Կարապետյանը, ապա՝ ոստիկանության շտաբի պետ, գեներալ Արա Զաքարյանն ու նրանք ևս հետաքրքվել են, թե որտեղ է Մովսես Ներսիսյանը:

«Ձեռնաշղթաներով էի, եկավ ոստիկանության աշխատակիցներից մեկը, «Բերետա» տիպի ատրճանակը դրեց գոտկատեղիս, ասաց՝ սա քոնն է»,- պատմեց Սարգսյանն ու նշեց, որ ինքն այդ ժամանակ հայտարարել է, որ երբ ձերբակալել են, իր մոտ զենք չի եղել:

Դրանից հետո, ըստ Սարգսյանի պատմածի՝ իրեն տարել են մի սենյակ, որտեղ հանդիպել է Վլադիմիր Գասպարյանին:

«Տարան մի այլ սենյակ, նստեցրին մի կլոր սեղանի մոտ, 5 րոպե անց այնտեղ մտավ Վովա Գասպարյանն՝ իր շքախմբով: Այնտեղ Աշոտ Կարապետյանն էլ էր, Արա Զաքարյանն էլ: Կանգնեց դիմացս, երկու բառ ասաց ու գնաց: Էդ Գոռ Վարդանյանի հետ կինո՞ եք նկարում, հա՞, սաղ աշխարհով մեկ ցույց տալիս, հեսա ես քո վրա նենց կինո եմ ասելու նկարեն, որ սաղ կյանքդ հիշես»,- ըստ Սարգսյանի՝ իրեն ասել է Վովա Գասպարյանն ու կատարել խոսքը: Շուտով «02» հաղորդաշարով ոստիկանությունը «ֆիլմ է» ցուցադրել այն մասին, որ սպանությունները կատարել են Իսրայել Սարգսյանն ու Մովսես Ներսիսյանը:

Սարգսյանը նշեց, որ առաջին ատյանի դատարանում գործի քննության ժամանակ այս ամենի մասին խոսել չէր կարող, քանի որ այն ժամանակ իրավիճակը Հայաստանում այլ էր, և Վլադիմիր Գասպարյանը ՀՀ ոստիկանապետն էր:

Ամբաստանյալը վստահ է, որ իր վերաբերյալ գործի քննությունը հանձնարարվել է ԱԱԾ-ին, քանի որ այն ժամանակ դատարանները հաստատում էին ԱԱԾ-ից ուղարկված բոլոր գործերով մեղադրանքները:

Հիշեցնենք, որ Երևանի քաղաքի ընդհանուր իրավասության դատարանը, նախագահությամբ դատավոր Արմեն Բեկթաշյանի, 2017 թվականի դեկտեմբերին հրապարակել է  քրեական աշխարհում որպես «Կայարանցի Թևոսիկ» հայտնի Թևոս Սաֆարյանի եղբոր` Արթուր Սաֆարյանի և Մովսես Ներսիսյանի  սպանության գործով դատավճիռ` ամբաստանյալ Իսրայել Սարգսյանին դատապարտելով 25 տարի ժամկետով ազատազրկման: Իսրայել Սարգսյանն այս որոշման դեմ բողոք է ներկայացրել Վերաքննիչ դատարան:

Նշենք, որ Արթուր Սաֆարյանը սպանվել է 2014-ի հունվարի 27-ին՝ Արամի նրբանցքի շենքերից մեկի մուտքի մոտ: Սպանության գործով կալանավորվել են Թևոս Սաֆարյանի շրջապատում գտնվող անձինք՝ Իսրայել Սարգսյանը և Տիգրան Ասատրյանը: Վերջինս շուտով ազատ է արձակվել, իսկ Իսրայել Սարգսյանին մեղադրանք է առաջադրվել սպանությունը կազմակերպելու ու դրան օժանդակելու համար: Ըստ մեղադրանքի՝ Իսրայել Սարգսյանը Մովսես Ներսիսյանին պատվիրել է Արթուր Սաֆարյանի սպանությունը, ապա հանցագործության հետքերը թաքցնելու համար սպանել Ներսիսյանին ու մարմինը նետել դիտահորը: Սարգսյանը մեղադրվում է նաև ապօրինի զենք, զինամթերք պահելու մեջ: Մովսես Ներսիսյանի դին առայսօր չի հայտնաբերվել, և նախաքննություն իրականացնող մարմինը նրան սպանված է համարել ապացույցների համակցությամբ:

Ըստ գործի նյութերի՝ Իսրայել Սարգսյանն ու Մովսես Ներսիսյանը վերջինիս անհետացման օրը հանդիպել են, և Իսրայել Սարգսյանը Մովսես Ներսիսյանին սպանել, ապա դին Մովսեսի մեքենայով տեղափոխել է Զովունի-Քանաքեռավան ճանապարհի մոտ, որտեղ էլ նետել է կոյուղու դիտահորն, ապա մեքենան տարել ու թողել «Զվարթնոց» օդանավակայանում՝ տպավորություն ստեղծելով, թե Մովսես Ներսիսյանը գնացել է Հայաստանից:

Նշենք, որ դիտահորը, որտեղից, ըստ գործի նյութերի, Իսրայել Սարգսյանը նետել է սպանված Մովսես Ներսիսյանին, գտնվում է Սարգսյանին պատկանող հողատարածքի մոտ: Այստեղ տևական ժամանակ ապարդյուն որոնողական աշխատանքներ են տարվել՝ Ներսիսյանի դիակը հայտնաբերելու ուղղությամբ: Չարենցավան քաղաքից մինչև Աերացիա հասնող կոյուղաջուրը Աերացիայում մաքրման է ենթարկվում, ապա թափվում Արաքս գետը: Աերացիայում նույնպես Մովսես Ներսիսյանի դին չի հայտնաբերվել:

Գործի քննության ընթացքում 4 անկենդան շուն և մեկ խոզ է նետվել այն դիտահորը, որից, ըստ գործի նյութերի, Իսրայել Սարգսյանը նետել է սպանված Մովսես Ներսիսյանի դին, և որոնողական աշխատանքների արդյունքում ինչ-որ ոսկորներ են հայտնաբերվել, որոնք, սակայն, չեն պատկանել մարդու:

Իսրայել Սարգսյանը երեքուկես տարուց ավելի տևած գործի քննության ամբողջ ընթացքում պնդել է, թե Մովսեսին չի սպանել, որ ինքն անձամբ է նրան հորդորել մեկնել Հայաստանից:

Դատական նիստի մանրամասները՝ տեսանյութում:

 

 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։