Կառավարությունը մերժեց ԱԺ պատգամավոր Սերգեյ Բագրատյանի՝ Ազգային ժողովի հերթական նստաշրջանի ընթացքում գումարվող  առնվազն մեկ արտագնա նիստը Հայաստանի մարզերից մեկում անցկացնելու առաջարկը:

Արդարադատության նախարարությունը նշել է, որ խնդրահարույց է, թե նման պարագայում ինչպես է Հայաստանի մարզերում ապահովվելու քվեարկության համար անհրաժեշտ տեխնիկական միջոցների ներկայությունը: «Դեռ հարց է, թե արդյո՞ք ՀՀ բոլոր մարզերն ապահովված են տեխնիկական միջոցներով հագեցած և Ազգային ժողովի պատգամավորների սահմանված քանակի տեղակայման պահանջները բավարարող  համապատասխան չափսերի դահլիճներով, ինչը կերաշխավորի Ազգային ժողովի նիստերի բնականոն գործընթացը»,- գործադիր ներկայացված որոշման նախագծում հայտնել է նախարարությունը:

Նախարարությունը նշել է նաև, որ այս պարագայում պարզ չէ նաև, թե ինչպես է Հայաստանի մարզերում գործնականում ապահովվելու Ազգային ժողովի նիստերի թե՛ մասնագիտական սպասարկումը և աջակցությունը, թե՛ նյութատեխնիկական ապահովումը: 

Բացի այդ, ԱԺ նիստը մարզերում գումարելու պարագայում անհրաժեշտ է լինելու պատգամավորներին մարզեր տեղափոխման նպատակով ապահովել տրանսպորտային միջոցներով, իսկ ավելի հեռու տեղակայված մարզերի դեպքում՝ նաև փոխհատուցել գիշերակացի և համանման այլ ծախսերը: Նախարարությունը նշել է, որ անհրաժեշտ է կատարել ֆինանսական հաշվարկներ՝ պարզելու համար, թե նախագծով նախատեսված կարգավորումներն ինչպիսի ֆինանսական բեռ են առաջացնելու պետական բյուջեի համար:

Արդարադատության նախարարությունը նաև ընդգծել է, որ հարց է, թե արդյոք գործնականում հնարավոր է լինելու երաշխավորել պատգամավորների անվտանգությունը և վերջիններիս գործունեության անխոչընդոտ իրականացման ապահովումը: