Հանրապետության մի շարք պետական բուհերում բարձրացրել են աշխատակիցների աշխատավարձերը։ Այս մասին լրագրողների հետ հանդիպմանն ասաց վարչապետ Նիկոլ Փաշինյանը՝ շարունակելով ներկայացնել նոր կառավարության գործունեությունը 100 փաստով։

«Ընդհանուր առմամբ, ավելացել է 2600 դասախոսի աշխատավարձ»,- ասաց նա։

Վարչապետի խոսքով՝ ատոմային էլեկտրակայանի շուրջ 1650 աշխատակիցների աշխատավարձերը բարձրացել են միջինը 16 տոկոսով։

«Մայիսին կբարձրանա Հայաստանի բարձրավոլտ էլեկտրացանցերի շուրջ 650 աշխատակիցների աշխատավարձը` միջինը 27 տոկոսով»,- ասաց Փաշինյանը։

Բնության հատուկ պահպանվող տարածքների ՊՈԱԿ-ներում միջինը 40 տոկոսով բարձրացել են 530 աշխատակիցների աշխատավարձերը։

Հաջորդ փաստն այն է, որ «Բուսասանիտարական լաբորատոր ծառայությունների կենտրոն» ՊՈԱԿ-ում միջինում 10,7 տոկոսով ավելացել է 148 աշխատակցի աշխատավարձը։

«Գեղարքունիքի մարզի 44 դպրոցներում խնայողությունների հաշվին 1722 ուսուցիչների և տնտեսական աշխատողների աշխատավարձերը բարձրացել են 6-15 տոկոսով։ Արմավիրի մարզի մանկապարտեզներում և ՀՈԱԿ-ներում մոտավորապես 450 աշխատողների աշխատավարձը բարձրացել է միջինը 10 տոկոսով»,- ասաց Փաշինյանը։

Ոստիկանության ծառայողների աշխատանքի վարձատրության համակարգում նոր՝ ամսական պարգևատրումների համակարգ է ներդրվել:

«Հունվար, փետրվար և մարտ ամիսներին վճարվել են համապատասխանաբար 27,7, 25,8, 25,03 դրույքաչափով պարգևավճարներ»,- ասաց Փաշինյանը։

Հաջորդ փաստը, կառավարության ղեկավարի խոսքով, երեխայի ծննդյան միանվագ նպաստի եռապատկումն է՝ 50 հազար դրամի փոխարեն 150 հազար դրամ։

«Կառավարության ընդունած որոշման արդյունքում 2020 թվականից սկսած` ընտանիքում բռնության ենթարկված շուրջ 100 անձինք կստանան մինչև 150 հազար դրամ աջակցություն, թրաֆիքինգի զոհ ճանաչված անչափահասները կստանան միանվագ դրամական աջակցություն 250 հազար դրամի չափով»,- ասաց Փաշինյանը։

Մյուս փաստը առևտրային բանկերին հնարավորություն ընձեռելն է՝ ներել ֆիզիկական անձանց ժամկետանց վարկերի գծով տույժերն ու տուգանքները: Ըստ այդմ` ներվել են շուրջ քսան հազար վարկառուի վարկերի գծով տույժերն ու տուգանքները՝ 11,5 միլիարդ դրամ ընդհանուր ծավալով։

Մաքրվել է շուրջ 125 հազար վարկառուների վարկային պատմությունը, ովքեր մինչև 50 հազար դրամ ժամկետանց վարկային մնացորդ ունեին։

«Կառավարության նախաձեռնությամբ 303 բռնադատված անձանց և նրանց ժառանգներին ներվել են արտոնյալ պայմաններում տրամադրած շուրջ 1 միլիարդ 300 միլիոն դրամի վարկերը»,- ասաց Փաշինյանը։

Փաշինյանի խոսքով՝ ներդրումային ծրագրի շրջանակում 49 ընկերության մաքսատուրքից ազատման արտոնություն է շնորհվել, որի արդյունքում շուրջ 4000 նոր աշխատատեղ է ստեղծվելու։