Համազասպ Դանիելյանն ասում է, որ պատգամավորներից մեկը բացակա պատգամավորին գրանցել է Ազգային ժողովի նիստին
Ազգային ժողովի «Իմ քայլը» խմբակցության պատգամավոր Համազասպ Դանիելյանը խորհրդարանում հայտարարեց, որ ինքը նկատել է, թե ինչպես է պատգամավորներից մեկը բացակա պատգամավորին գրանցել Ազգային ժողովի նիստին.
«Ներողություն եմ խնդրում, որ քննարկվող թեմայից չեմ խոսելու, սակայն կարծում եմ սա կարևոր է: Մեր դահլիճում այսօր ֆիքսեցի, որ եղավ դեպք, երբ որ մեկ պատգամավորը ներկա չէր, բայց գրանցված էր, այսինքն՝ գործընկերն էր գրանցել: Սա առաջին դեպքը չէ այս դահլիճում, և ես կոչ եմ անում նման քայլերից զերծ մնալ, որովհետև դա ազնիվ չէ: Շնորհակալություն»,- ասաց Դանիելյանը:
Օրենսդիրների հարցին, թե ով է եղել այդ պատգամավորը, Համազասպ Դանիելյանը նշեց, որ հետո կասի:
Խորհրդարանի նախագահ Արարատ Միրզոյանն ասաց, որ կասկածի տակ չի դնում Համազասպ Դանիելյանի հայտարարությունը, սակայն ցանկանում է հիշեցնել, որ նախկինում խորհրդարանում եղած բարքերը, հատկապես ուրիշի փոխարեն քվեարկելը, 7-րդ գումարման Ազգային ժողովում չեն կարող գործել: ԱԺ նախագահը հույս հայտնեց, որ Դանիելյանի նկատածը պարզապես թյուրիմացության արդյունք է, սակայն շնորհակալություն հայտնեց նրան այդ հարցի վերաբերյալ խորհրդարանի ուշադրությունը հրավիրելու համար:
Մեկնաբանել