Տրանսպորտի, կապի և տեղեկատվական տեխնոլոգիաների նախարարությունն առաջարկում է պետական նշանակության ճանապարհների հիմնանորոգման համար իրեն հատկացնել հավելյալ 7 միլիարդ 400 միլիոն դրամ։ Նախարարությունը նախատեսում է այդ գումարը ստանալ կառավարության պահուստային ֆոնդից։

Նախարարությունն այսպիսի նախագիծ է քննարկման ներկայացրել իրավական ակտերի նախագծերի հրապարակման միասնական կայքէջում։

Չնայած նախարարությանն արդեն իսկ հատկացվել է 9 մլրդ դրամ, սակայն ընդգծվում է, որ այն բավարար չէ Հայաստանի ողջ տարածքում ոչ բավարար վիճակում գտնվող ճանապարհների հիմնանորոգմանը։

Նախարարությունը, ժամանակի սղությունը հաշվի առնելով, առաջարկել է որոշման ուժի մեջ մտնելուց հետո 30-օրյա ժամկետում կառավարություն ներկայացնել հիմնանորոգվող օբյեկտների ցանկը` ներառյալ հեղինակային, տեխնիկական հսկողության աշխատանքների համար սահմանվող միջոցները: