Բնապահպանական ՀԿ-ների շրջանում բողոքի նոր ալիք է բարձրացրել Հայաստանում ուրանի հանքերի հնարավոր շահագործման հեռանկարը, որի մասին Երևան կատարած այցի ժամանակ հայտարարել էր ՌԴ «Ռոսատոմ» ատոմային էներգիայի հարցերով պետական կորպորացիայի գլխավոր տնօրեն Սերգեյ Կիրիենկոն:

Լրագրողների հետ հանդիպմանը Ս. Կիրիենկոն խոսել էր ՀՀ-ում ուրանի և այլ հազվագյուտ մետաղների որոնման աշխատանքների և հանքօգտագործման «հետաքրքիր» հեռանկարների մասին:

Հիշեցնենք, որ  ուրանի որոնողահետախուզական աշխատանքներն իրականացնում է 2008թ. ստեղծված Հայ-ռուսական լեռնահանքային ընկերությունը:

Չնայած Կիրիենկոն իր խոսքում նշել էր, որ ոչ բոլոր հայտնաբերված հանքերն են ծառայելու արդյունաբերական նպատակին, և հաշվի է առնվելու հանրության, հատկապես՝ տեղի բնակչության կարծիքը, նրա ելույթը մտահոգեց հասարակության տարբեր շերտերին:

Ուրանի հանքերի դեմ պայքարին միացած կազմակերպությունների և հանրության անունից մամուլում հաղորդագրություն է տարածել «Կայուն զարգացում» ՀԿ-ի նախագահ Արմեն Փարսադանյանը, որում մասնավորապես ասված է.

«Եթե պարոն Կիրիենկոն կարծիք է հայտնում, որ անպայման հաշվի կառնվի հայկական կողմի դիրքորոշումը ուրանի հանքերի հնարավոր շահագործման վերաբերյալ, մենք 2010թ-ին ստորագրահավաքի միջոցով հայտնել ենք հայկական կողմի դիրքորոշումը, մնում է ՀՀ իշխանությունները մարտահրավեր չնետեն հանրությանը և ՀԿ-ներին: Հակաուրանյան շարժումը նախաձեռնողները կազմակերպել են ստորագրահավաք, որին մասնակցել է 13.850 քաղաքացի, որոնց դիրքորոշումը հստակ պատկերացնելու նպատակով հնարավորություն էր տրվել նախագծի վերաբերյալ իրենց կարծիքը արտահայտել «կողմ», «դեմ», «ձեռնպահ» պատասխաններով: Ստորագրահավաքին մասնակիցների 99%-ից ավելին դեմ է արտահայտվել ուրանի հանքերի հնարավոր շահագործմանը:Անիմաստ են նաև այն խոսակցությունները, որ ստորագրահավաքը կազմակերպվել է միայն բացասական դիրքորոշում ունեցող քաղաքացիների շրջանում, քանի որ ստորագրահավաքին աջակցել է մոտ 200 կամավոր, և կամավորները նախապես չէին կարող իմանալ քաղաքացիների դիրքորոշումը:

Ես համաձայն չեմ պարոն Կիրիենկոյի այն կարծիքին, որ ՀՀ իշխանությունները պատշաճ երկխոսություն են վարում տարածաշրջանի բնակչության հետ, և այս արտահայտությամբ նա փորձում է մեղմել իշխանությունների և հանրության միջև ծագած հակասությունը խնդրի վերաբերյալ, այնինչ` հանրության դիրքորոշումը հստակ է և անփոփոխ:

Պարոն Կիրիենկոն փորձում է առանց ՀՀ իշխանությունների վստահության կորստի, քաղաքակիրթ ձևով ակնարկել, որ, իհարկե, կան հանրության և իշխանության միջև տարաձայնություններ, բայց դա  լուծելի է, որը ավելի շատ ՀՀ իշխանությունների ներքին խնդիրն է:

Առիթից օգտվելով` ևս մեկ անգամ հիմնավորենք մեր դիրքորոշումը: Մենք դեմ ենք ուրանի որոնողական աշխատանքներին, քանի որ չենք վստահում, որ այն կլինի անվտանգ շրջակա միջավարի և մարդու առողջության վրա: Ասեմ ավելին` ՀՀ իշխանությունները չեն կարող դիմակայել ազդեցիկ պետությունների էներգետիկ ոլորտի զարգացման հավակնություններին և մերժել ուրանի հանքերի շահագործման առաջարկները:

Մենք չենք կարծում, որ ՌԴ-ն մտադիր է հետ կանգնել պետական շահերից  հանուն Հայաստանի շրջակա միջավայրի պահպանության խնդիրների և բնակչության առողջության,  ուստի պարոն Կիրիենկոյի արձագանքը մեր մտահոգություններին ձևական բնույթ է կրում»: