Քրեական աշխարհում «Նորատուսի Արա» անունով հայտնի Արա Բանդուրյանն իրեն մեղավոր չճանաչեց խուլիգանության և ապօրինի զենք պահելու մեջ: Երևան քաղաքի ընդհանուր իրավասության դատարանի Կենտրոնի նստավայրում, նախագահությամբ դատավոր Կարեն Ֆարխոյանի, այսօր մեկնարկեց Բանդուրյանի վերաբերյալ գործը:

Արա Բանդուրյանին, հիշեցնենք, մեղադրանք է առաջադրվել այն բանի համար, որ 2018թ․ հոկտեմբերի 13-ին Երևան քաղաքի Հյուսիսային պողոտա 4/1 հասցեում գործող «Հուկաման» ակումբում գտնվող անձանց նկատմամբ բռնություն գործադրելու սպառնալիքով՝ նույն ժամանակահատվածում քննությամբ չպարզված անձից ապօրինի ձեռք բերած և կրած 9մմ տրամաչափի հրազեն հանդիսացող ատրճանակով կատարել է խուլիգանություն։

Մեղադրանքն ընթերցելիս դատախազ Ռաֆայել Մանուկյանը խոսեց նաև ակումբում գտնվող անձանց սպառնալիք տալու մասին:

«Մեղավոր չեմ ճանաչում ինձ. մարդկանց սպառնալիք տալ, նման բան չի եղել»,- հայտարարեց Արա Բանդուրյանը:

Բանդուրյանի պաշտպան Կարեն Բատիկյանը նշեց, որ նրա արարքին սխալ քրեաիրավական գնահատական է տրվել, դեպքի պահին Բանդուրյանը գտնվել է հուզական վիճակում, ինչի արագայում արարքը  չէր կարող խուլիգանություն որակվել։ Ըստ պաշտպանի՝ դեպքի օրն ակումբում հասարակական կարգի կոպիտ խախտում տեղի չի ունեցել:

Նշենք, որ Բանդուրյանը գործի նախաքննության սկզբնական փուլում գտնվում էր կալանքի տակ, սակայն այժմ դատարանի որոշմամբ 2մլն դրամ գրավի դիմաց ազատ է արձակվել:

Երևանի ընդհանուր իրավասության դատարանի որոշմամբ Արա Բանդուրյանը երկու ամսով կալանավորվել էր, սակայն մեկ ամիս անց 2 մլն դրամ գրավի կիրառմամբ ազատ արձակվել կալանքից։