Նորատուսցի Արային մեղադրանք է առաջադրվել. նրան կալանավորելու միջնորդություն է ներկայացվել դատարան
Հյուսիսային պողոտայում գործող ակումբներից մեկում տեղի ունեցած միջադեպի գործով մեղադրանք է առաջադրվել քրեական աշխարհում Նորատուսցի Արա անունով հայտնի Արա Բանդուրյանին։ Վերջինս մեղադրվում է քրեական օրենսգրքի 235-րդ հոդվածի 1-ին և 258-րդ հոդվածի 4-րդ մասով:
Քննչական կոմիտեի նախագահի խորհրդական Սոնա Տռուզյանը մեզ հետ զրույցում նշեց, որ քննիչը որոշում է կայացրել միջնորդություն ներկայացնել դատարան՝ Բանդուրյանի կալանավորումը որպես խափանման միջոց ընտրելու վերաբերյալ։
Հիշեցնենք, որ ըստ ոստիկանության պաշտոնական հաղորդագրության՝ հոկտեմբերի 13-ին տեղեկություններ են ստացվել, որ նույն օրը` ժամը 2-ին, Հյուսիսային պողոտայի ակումբներից մեկում Նորատուս գյուղի բնակիչ Արա Բանդուրյանը, կոպիտ կերպով խախտելով հասարակական կարգը, ակումբի աշխատակիցների և հաճախորդների ներկայությամբ իր մոտ եղած ատրճանակով մի քանի անգամ կրակոցներ է արձակել:
Ըստ ոստիկանության տարածած հաղորդագրության՝ Արա Բանդուրյանը ներկայացել է ոստիկանության Կենտրոնական բաժին ոստիկանության ծառայողների իրականացրած բացատրական աշխատանքի շնորհիվ։
Մեկնաբանել