Սամվել Բաբայանի համակիրների ուղղությամբ կրակոցներ արձակելու գործով ձերբակալված Ռոլանդ Այդինյանն ու Ալեքսեյ Բալայանը (ազատամարտիկ Վլադիմիր Բալայանի որդին) կալանավորվել են:

Նրանց մեղադրանք է առաջադրվել Քրեական օրենսգրքի 235 հոդվածի 2-րդ մասով` ապօրինի կերպով զենք-զինամթերք ձեռք բերելը, կրելը կամ փոխադրելը, որոնք կատարվել են մի խումբ անձանց կողմից՝ նախնական համաձայնությամբ:

Այս մասին «Հետքի» հետ զրույցում ասաց  Քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետի ժամանակավոր պաշտոնակատար Նաիրա Հարությունյանը:

Հիշեցնենք, որ Սամվել Բաբայանի գրասենյակը տեղեկատվություն էր հրապարակել այն մասին, որ մայիսի լույս 29-ի գիշերը Սևան-Մարտունի ճանապարհին Սամվել Բաբայանի համակիրների ուղղությամբ կրակահերթ է արձակվել: Հաղորդագրության մեջ հիշատակվել էր նաև կալանավորված անձանց՝ Ալեքսեյ Բալայանի և Ռոլանդ Այդինյանի անունները:

Ոստիկանությունն ավելի վաղ հայտնել էր այն մասին, որ գործով կասկածյալի կարգավիճակ ունեն երկու անձինք՝ Հայկ Մ.-ն և Վրեժ Ա.-ն: Նրանց նկատմամբ խափանման միջոց է ընտրվել չհեռանալու մասին ստորագրությունը:

Ոստիկանության տարածած հաղորդագրությունից

Քրեական գործով նշանակվել են դատաբժշկական, դատահետքաբանական, դատաձգաբանական համալիր փորձաքննություններ։ Մեքենան տեղափոխվել է ոստիկանության Սևանի բաժնի պահպանվող հատուկ տարածք։ Ոստիկանության տարածած հաղորդագրության համաձայն՝  քննությամբ ձեռք բերված տվյալներով՝ միջադեպն անձնային հարաբերությունների դաշտում է: