Վերաքննիչ քրեական դատարանի դատավոր Վազգեն Ռշտունին քիչ առաջ հեռացավ խորհրդակցական սենյակ՝ Ռոբերտ Քոչարյանի գործով իրեն ներկայացված ինքնաբացարկի միջնորդության վերաբերյալ որոշում կայացնելու:

Նշենք, որ այսօր դատավոր Վազգեն Ռշտունու նախագահությամբ քննվում էր Հայաստանի երկրորդ նախագահ Ռոբերտ Քոչարյանի նկատմամբ անձեռնմխելիության հիմքով քրեական հետապնդումը չդադարեցնելու վերաբերյալ առաջին ատյանի դատարանի որոշման դեմ Քոչարյանի պաշտպանների բողոքի քննությունը:

Քոչարյանին դատավոր Ալեքսանդր Ազարյանի որոշմամբ անձեռնխելիության հիմքով ազատելուց հետո նրա պաշտպան Հովհաննես Խուդոյանը վարույթն իրականացնող մարմնին՝ Հատուկ քննչական ծառայությանը, միջնորդել է նրա նկատմամբ դադարեցնել քրեական հետապնդումը, սակայն միջնորդությունը մերժվել է: Մերժման որոշումը բողոքարկվել է առաջին ատյանի դատարան, և դատավոր Գագիկ Պողոսյանը մերժել է Խուդոյանի բողոքը: Դատական ակտը պաշտպանի կողմից բողոքարկել է Վերաքննիչ դատարան: Այն այժմ քննում է դատարանի նախագահ Վազգեն Ռշտունին:

Նախորդ դատական նիստի ընթացքում Մարտի 1-ի գործով քննչական խմբի ղեկավար Հրաչ Մուշեղյանն ինքնաբացարկ էր հայտնել Ռշտունուն՝ վկայակոչելով լրատվամիջոցներից մեկին նրա տված հարցազրույցը:

Մասնավորապես՝ Ռոբերտ Քոչարյանին, դատավոր Ալեքսանդր Ազարյանի որոշմամբ, անձեռնմխելիության հիմքով ազատելուց հետո Ռշտունին լրատվամիջոցներից մեկի հետ զրույցում ասել է, որ որպես իրավաբան՝ համաձայն է Ազարյանի որոշման հետ, ուստի քննիչ Մուշեղյանը գտնում է, որ դատավորը այս գործով կարող է կանխակալ լինել:

Այսօրվա դատական նիստին ներկա դատախազներ Վահե Դոլմազյանն ու Կարեն Բիշարյանը ևս միացան ինքնաբացարկի միջնորդությանը: Կարեն Բիշարյանը նշեց, որ դատավորն անձնական դիրքորոշում է հայտնել քննարկման առարկա հանդիսացող խնդրի վերաբերյալ:

Դատավոր Ռշտունին հարց տվեց՝ արդյոք, ըստ մեղադրող Բիշարյանի, այս բողոքը կարող էին քննել Վերաքննիչ դատարանի այն դատավորները, որոնք նախկինում քննել են Քոչարյանի խափանման միջոցի հարցը: Կարեն Բիշարյանը հարցին չպատասխանեց՝ նշելով, թե ինքն այս գործով մեղադրող դատախազ է, և հետագայում իր հայտնած դիրքորոշումը կարող է շահարկվել:

«Ձեր կարծիքով հիմա շահարկվո՞ւմ է»,- դիտարկեց Վազգեն Ռշտունին:

Քոչարյանի պաշտպաններից Արամ Օրբելյանը դիրքորոշում հայտնելիս ասաց, որ իր կարծիքով, ինքնաբացարկի հիմք չկա, իսկ Հովհաննես Խուդոյանն ասաց, որ դատավորն ինքը պիտի որոշի՝ անաչառ է, թե ոչ:

Դատարանը հեռացավ խորհրդակցական սենյակ՝ որոշում կայացնելու:

Նշենք, որ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ մասով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու համար:

Երևանի ընդհանուր իրավասության դատարանի դատավոր Դավիթ Գրիգորյանը մայիսի 18-ին, քննելով Քոչարյանի խափանման միջոցի հարցը, որոշել է նրան ազատել կալանքից Արցախի Հանրապետության նախկին և ներկա նախագահներ Արկադի Ղուկասյանի և Բակո Սահակյանի անձնական երաշխավորությամբ, իսկ մայիսի 20-ին, դատարանը որոշել է կասեցնել Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործի վարույթն ու այն ուղարկել Սահմանադրական դատարան` պարզելու համար այս գործով կիրառման ենթակա ՀՀ քրեական օրենսգրքի 300.1-րդ հոդվածի 1-ին մասի և դրա հետ փոխկապակցված ՀՀ քրեական օրենսգրքի 300-րդ հոդվածի 1-ին մասի (մինչեւ 2009 թվականի մարտի 20-ին ընդունված ՀՕ-53-Ն օրենքի ուժի մեջ գտնվելը գործող խմբագրությամբ) համապատասխանությունը ՀՀ Սահմանադրության պահանջներին: