HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Համայնքի ղեկավարի կինը, առանց բարձրագույն կրթության, մանկապարտեզի տնօրեն է աշխատել

Արմավիրի մարզի Լեռնագոգ համայնքի ղեկավար Սարգիս Մարգարյանի կինը՝ Լուսիա Ասատրյանը, մոտ 11 տարի աշխատել է մանկապարտեզի տնօրենի պաշտոնում՝ չունենալով բարձրագույն կրթություն:

«Նախադպրոցական կրթության մասին» օրենքի համաձայն՝ նախադպրոցական ուսումնական հաստատության տնօրենի պաշտոն զբաղեցնողը պետք է ունենա բարձրագույն կրթություն, ինչպես նաև վերջին 10 տարվա ընթացքում առնվազն երկու տարվա ընդհանուր աշխատանքային ստաժ:

Լեռնագոգի համայնքապետ Սարգիս Մարգարյանը «Հետք»-ի հետ զրույցում ասաց, որ կինը բուհ-ից դուրս է մնացել 5-րդ կուրսի առաջին կիսամյակից՝ երեխաների պատճառով: Իսկ երբ նշանակվել է տնօրենի պաշտոնում, այդ ժամանակ բարձրագույն կրթության պահանջ չկար: Հետագայում, երբ օրենսդիրն ամրագրել է այդ պահանջը, և եղել է կրթության և գիտության նախարարի հրամանը՝ պարտադիր բարձրագույն կրթության պահանջով, կինը մոտ 4 տարվա աշխատող է եղել և պարբերաբար մասնակցել է վերապատրաստման դասընթացներին:

«Մանկապարտեզի տնօրենի պաշտոնից ազատվելու դիմում է գրել և աշխատանքից ազատվել է»,- ասաց Ս. Մարգարյանը: Ըստ նրա՝ նախկինում և՛ վերահսկիչ պալատը, և՛ մարզպետարանը ստուգումներ իրականացրել են համայնքում և այդ փաստը խախտում չեն համարել:

Նշենք, որ համայնքապետարանում աշխատել է նաև համայնքապետի որդին՝ Տիգրան Մարգարյանը: Վերջինս եղել է առաջատար մասնագետ: Առաջատար մասնագետի պաշտոնային դրույքաչափը եղել է 193 000 դրամ:

«Ինչ ա, իրավունք չունի՞ աշխատելու: Նա էլ է աշխատանքից ազատվել՝ սեփական դիմումի համաձայն: Տեղափոխվել է այլ աշխատանքի»,- հավելեց համայնքապետը:

Տեղեկացնենք, որ մարզպետի որոշմամբ՝ Լեռնագոգի համայնքապետարանում այս տարի իրականացվել է իրավական և մասնագիտական ստուգում: Տնօրենի բարձրագույն կրթություն չունենալը նշվել է որպես օրենքի պահանջների խախտում և համայնքապետին առաջարկվել է մանկապարտեզի տնօրենի պահանջներին բավարարող մասնագետ: Սակայն ստուգող մարմինը «չի նկատել», որ տնօրենի պաշտոն զբաղեցնողը եղել է համայնքապետի կինը և համայնքապետն ակնհայտ շահագրգռվածություն ուներ տարիներ շարունակ նրան այդ պաշտոնում պահելու հարցում:

 
Լուսանկարում՝ Սարգիս Մարգարյանը

Մեկնաբանություններ (1)

????
Հարգելիներս ուղղակի մարզպետը թող հիմա տեսնի իրենց ,,դաբռոն,,ստացած համայնքի ղեկավարի կողմից նշանակած մանկապարտեզի տնօրեններին, ընտրություններին խոստացած ,բայց պաշտոնին չհամապատասխանող տնօրեն թե տնտեսվար

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։