Արթուր Հովհաննիսյանը պատգամավորական մանդատ է ստացել
2018թ. դեկտեմբերի 9-ի խորհրդարանական ընտրություններին «Իմ քայլը» դաշինքի ցուցակով առաջադրված Արթուր Հովհաննիսյանն այսօր պատգամավորական մանդատ է ստացել, այն բանից հետո, երբ «Իմ քայլը» խմբակցության արդեն նախկին պատգամավոր Նարինե Խաչատուրյանը մանդատից հրաժարվելու դիմում էր ներկայացրել, որի մասին համապատասխան արձանագրություն էր ստորագրել Ազգային ժողովի նախագահ Արարատ Միրզոյանը:
Կենտրոնական ընտրական հանձնաժողովի տարածած հաղորդագրության մեջ ասվում է հետևյալը.
«Կենտրոնական ընտրական հանձնաժողովն այսօրվա նիստում, հիմք ընդունելով Ազգային Ժողովի նախագահի` հունիսի 7-ի «Ազգային Ժողովի պատգամվոր Նարինե Խաչատուրյանի` պատգամավորի լիազորությունները դադարած համարելու մասին» արձանագրությունը և ղեկավարվելով Ընտրական օրենսգրքի 100-րդ հոդվածի 3-րդ մասով, կազմել է արձանագրություն, ըստ որի՝ Ազգային Ժողովի Իմ քայլը կուսակցությունների դաշինքի ընտրական ցուցակից ընտրված և լիազորությունները վաղաժամկետ դադարած պատգամավորի մանդատը տրվում է նույն դաշինքի համապետական ընտրական ցուցակի առաջին մասի հերթական հաջորդ թեկնածու Արթուր Հովհաննիսյանին»:
Մեկնաբանել