Ալեքսանդր Սարգսյանի որդի Հայկ Սարգսյանի տեղեկություններով՝ Չեխիայի արդարադատության նախարարը եղբորը՝ Նարեկ Սարգսյանին, արտահանձնելու վերաբերյալ համաձայնություն չի տվել։ Այս մասին դատարանում լրագրողների հարցին ի պատասխան ասաց Հայկ Սարգսյանը։

«Իմ իմանալով՝ համաձայնություն չի տվել»,- ասաց Սարգսյանը: Նա հայտնեց նաև, որ հայրը՝ Ալեքսանդր Սարգսյանը, նորից բուժման նպատակով գտնվում է արտերկրում:

Նշենք, որ ավելի վաղ հայտնի էր դարձել, որ Պրահայի մունիցիպալ դատարանը բավարարել է Նարեկ Սարգսյանին Հայաստանի իրավասու մարմիններին հանձնելու միջնորդությունը, որից հետո արտահանձնման վերաբերյալ պետք է դիրքորոշում հայտներ նաև արդարադատության նախարարը:

Հիշեցնենք, որ 2018 թվականի դեկտեմբերի 7-ին ոստիկանությունը հայտնել է, որ տարբեր ստորաբաժանումներ, ինչպես և Հայաստանում ինտերպոլի ազգային կենտրոնական բյուրոն, համագործակցելով եվրոպական մի շարք երկրների իրավապահ կառույցների ու ինտերպոլի հետ, ծավալուն օպերատիվ-հետախուզական միջոցառումների շնորհիվ, դեկտեմբերի 6-ին Պրահայում հայտնաբերել են Հայաստանի իրավապահ մարմինների կողմից միջազգային մակարդակով հետախուզման մեջ գտնվող Նարեկ Ալեքսանդրի Սարգսյանին:

Ըստ հաղորդագրության՝ հայտնաբերման պահին նա ներկայացրել է Գվատեմալայի քաղաքացու կեղծ անձնագիր՝ Ֆրանկլին Գոնսալեսի անհատական տվյալներով:

Հետախուզվողի հայտնաբերման մասին տեղեկությունը փոխանցվել էր ՀՀ գլխավոր դատախազությանը՝ էքստրադիցիայի գործընթացը կազմակերպելու նպատակով:

Նարեկ Սարգսյանն անցում է ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու և թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելու հատկանիշներով հարուցված քրեական գործով: Նրա նկատմամբ հետախուզում էր հայտարարվել 2018-ի հուլիսի 6-ից:

լուսանկարը՝ Facebook