Դատապարտյալն ասում է, որ պայմանական վաղաժամկետ ազատման վերաբերյալ վարչապետին ճիշտ չեն զեկուցում
Բաբկեն Ղարդյանը «Վարդաշեն» քրեակատարողական հիմնարկի դատապարտյալ է: Երբ գտնվում էինք քրեակատարողական հիմնարկում, նա խնդրեց, որպեսզի անդրադառնանք պայմանական վաղաժամկետ ազատման ոլորտում տիրող իրավիճակին և իր օրինակով փորձեց ցույց տանք, որ ոչինչ չի փոխվել, թեև հույսով սպասում են ոլորտի բարեփոխմանը: Նա իր բարձրացրած հարցի մասին զրուցեց հենց քրեակատարողական հիմնարկի աշխատակցի ներկայությամբ:
Բաբկենը նախկին զինվորական է: Առաջին ատյանի դատարանը նրան դատապարտել է 5 տարի ժամկետով ազատազրկման, սակայն Վերաքննիչ դատարանը, բավարարելով մեղադրող դատախազի բողոքը, բեկանել և փոփոխել է դատական ակտը՝ նշանակելով 8 տարի ժամկետով ազատազրկում: Պատժի ժամկետի սկիզբը հաշվվում է 2015թ. հունվարի 31-ից:
Չենք անդրադառնում քրեական գործի մանրամասներին, քանի որ դատավճիռը մտել է օրինական ուժի մեջ: Բաբկենն իրեն մասամբ մեղավոր է ճանաչում և ասում է, որ կկրի պատիժը՝ զինվորականների միջև տեղի ունեցած վիճաբանության ընթացքում միմյանց նկատմամբ բռնություն գործադրելու հանգամանքների մասին վերադաս հրամանատարությանը չհաղորդելու համար: Ասում է, որ չի տեղեկացրել, քանի որ չի ցանկացել քրեական գործ հարուցվի վիճաբանող կողմերի նկատմամբ: Մյուս մեղադրանքների մասով, որոնք վերաբերում են սեռական անձեռնմխելիությանը, չի ընդունում: Ասում է, որ գործը սարքած է, քանի որ կոնֆլիկտ է ունեցել դատախազության աշխատակիցների հետ և սպասում է, որպեսզի վեթինգի արդյունքում բացահայտվեն գործի մանրամասները: Ցանկանում է վերականգնել նաև իր անունը և վերադառնալ ծառայության:
«Պատիժը կրելու ընթացքում առաջ հասկանում էինք, որ իրավիճակի հետ կապված խնդիր կար, պայմանական կամ բաց ռեժիմ դուրս էինք գալիս, օրինակ՝ կաշառքով կամ ծանոթի միջոցով: Հիմա կաշառքը չկա, մենք վստահ ենք, բայց ծանոթությունը դեռ ոնց որ մնացել է և ուղղակի անհիմն պատճառներով մարդկանց մերժում են: Բերդի անձնակազմը, որ մեր հետ աշխատում է, այդ մարդիկ երևում է, որ օր ու գիշեր աշխատում են, ցավում են, և իրենք իրենց բնութագրով դրական են տալիս, բայց այդ դրականը գնում, հասնում է պրոբացիա, կամ գնում, հասնում է վարչություն, չգիտես ոնց դառնում է բացասական: Ոնց որ կոնֆլիկտ հրահրեն»,- ասում է Բաբկեն Ղարդյանը:
Դատապարտյալը կարծում է, որ վարչապետին ստել կամ ճիշտ չեն զեկուցել, թե իբր «պայմանական վաղաժամկետ-ը գործում է: Ըստ նրա, եթե բոլորը հավասար են օրենքի առաջ, ապա բոլորի համար պայմանական վաղաժամկետ ազատման խաղի կանոնները պետք է նույնը լինի, մինչդեռ այդպես չէ:
«Կոնկրետ իմ դեպքում, հայրս գնացել է ծերանոց, ես ինքնակամ գնացել եմ Ղարաբաղ, 10 տարի ծառայել եմ: Միջին խավից բերդում գտնվելու ժամանակ դարձել եմ ծայրահեղ աղքատ: Հիմա խնդրում եմ՝ ինձ հնարավորություն տվեք, ես դուրս գամ, ապացուցեմ, որ պիտանի եմ հասարակությանը, աշխատեմ, վերականգնեմ: Մերժում ու մերժում են՝ անհիմն պատճառաբանություններով»,- նշում է Բ. Ղարդյանը և հավելում, որ պատճառաբանություներից մեկը վերաբերում է չաշխատելուն, մինչդեռ աշխատանք չեն տրամադրում, նման հնարավորություն չկա:
«Միայն հավաքարարի գործ է: Ճիշտ հասկացեք, այստեղ էլ բոլորը նախկին բարձրաստիճան պաշտոնյաներ են, հիմա ինչ, բոլորը պիտի գնան հավաքարարություն անեն, որ թողնեն բաց ռեժի՞մ: Ես պատրաստ եմ գնամ հավաքարարություն անեմ, աշխատանքս ապահովեմ, բայց կոնկրետ բերդում պատրաստ չեմ: Սա սկզբունքի հարց չի»,- ասում է դատապարտյալը:
Բ. Ղարդյանն ասում է, որ պայմանական վաղաժամկետ ազատման կոնկրետ չափորոշիչ չկա, ի տարբերություն այլ երկրների: Օրինակ է բերում, Բրազիլիան, որտեղ 3 գիրք կարդացողի պատժաչափը մեկ օրով նվազում է և այլն: Մանրամասները՝ տեսանյութում:
Տեսանյութը և լուսանկարը՝ Սարո Բաղդասարյանի
Մեկնաբանել