Առաջարկվում է դատապարտյալին կամ կալանավորին պատժախուց տեղափոխելիս վերջիններիս այլ իրավունքները չսահմանափակել
Խորհրդարանն արտահերթ նիստով քննարկում է Կառավարության ներկայացրած «Քրեակատարողական օրենսգրքում» փոփոխություններ կատարելու և «Ձերբակալված ու կալանավորված անձանց պահելու մասին» օրենքում փոփոխություններ կատարելու նախագծերի փաթեթը:
Նախագծերի հիմնական զեկուցող արդարադատության փոխնախարար Տիգրան Խաչիկյանի խոսքով՝ ընդունումը պայմանավորված է ՍԴ 1442 որոշման պահանջներով: Ըստ հիմնավորման՝ ազատությունից զրկված անձի նկատմամբ տույժի միջոցները կիրառելիս հաշվի են առնվելու ոչ միայն խախտումը կատարելու հանգամանքները, դատապարտյալի անձը և նրա վարքագիծը՝ նախքան խախտումը կատարելը, այլ նաև տույժի միջոցի կիրառմամբ հետապնդվող իրավաչափ նպատակին հասնելու ողջամիտ անհրաժեշտությունը:
Փոխնախարարի ներկայացմամբ՝ դատապարտյալին կամ կալանավորին պատժախուց տեղավորելու ձևով կարպագապահական տույժի նշանակումը փոփոխության դեպքում չի հանգեցնելու դատապարտյալի կամ կալանավորի այլ իրավունքների սահմանափակմանը: Գործող օրենքով դատապարտյալին կամ կալանավորին պատժախուց տեղափոխելուց վերջինիս արգելվում է դրամական փոխանցումներ ստանալ ու կատարել, հանձնուք ստանալ կամ ուղարկել, քաղաքացիաիրավական գործարքների մասնակցել, տեսակցություններից, հեռախոսակապից, ԶԼՄ-ներից և գրականությունից օգտվել:
Խաչիկյանի խոսքով՝ սահմանափակումը կիրառելիս անհրաժեշտ է հետապնդվող միջոցի և նպատակի միջև հավասարակշռության ողջամիտ հարաբերակցության նշան դնել:
«Մենք դրել ենք ուղղակի օրենսդրական պահանջ, որ ՔԿՀ վարչակազմը, երբ դատապարտյալի կամ կալանավորի նկատամամբ կիրառում է որևէ սահմանափակում, պարտավոր է հիմնավորել դատապարտյալի կողմից ենթադրաբար կատարված վարքագծի խափանման և իր կողմից կիրառվող սահմանափակման միջև պատճառական կապը»,-ասաց նա:
Մեկնաբանել