Երևան քաղաքի ընդհանուր իրավասության դատարանը՝ նախագահությամբ դատավոր Մնացական Մարտիրոսյանի, քիչ առաջ հեռացավ խորհրդակցական սենյակ՝ ԱԺ նախկին պատգամավոր Մանվել Գրիգորյանի խափանման միջոցի գործով որոշում կայացնելու:

Հիշեցնենք, որ դատական նիստի մեկնարկին նման միջնորդություն էր ներկայացրել Գրիգորյանի պաշտպաններից Լևոն Բաղդասարյանը: Մինչ դատարանի խորհրդակցական սենյակ հեռանալը մեղադրող դատախազ Վահե Դոլմազյանն առարկեց միջնորդության դեմ:

Դատախազը նշեց, որ Մանվել Գրիգորյանն այժմ գտնվում է քաղաքացիական հիվանդանոցում. եթե նրա խափանման միջոցը վերացվի և ազատ արձակվի, ապա նորից գտնվելու է քաղաքացիական հիվանդանոցում: Դոլմազյանը նշեց նաև, որ պաշտպանը թվարկում է Գրիգորյանի մի շարք հիվանդություններ, որոնք իր համար հասկանալի չեն: Ըստ դատախազի՝ Գրիգորյանի առողջական վիճակի վերաբերյալ հստակ դիրքորոշում կարող են տալ միայն բժիշկ մասնագետները, և դրանով է պայմանավորված, որ ինքը դեռևս հունիսի 18-ին միջնորդել է Գրիգորյանի նկատմամբ միջգերատեսչական հանձնաժողովային փորձաքննություն նշանակել:

Նշենք, որ առողջապահության նախարար Արսեն Թորոսյանի՝ հունիսի 11-ի հրամանով «Նաիրի» բժշկական կենտրոնում Մանվել Գրիգորյանին բուժող բժիշկների կոնսիլիում է կազմակերպվել, որի արդյունքում նրա մոտ մի շարք հիվանդություններ են ախտորոշվել: Նրա պաշտպան Լևոն Բաղդասարյանի խոսքով՝ բժիշկներն անձանագրել են, որ Գրիգորյանը մշտապես կարիք ունի սրտաբանի, ուռուցքաբանի, էնդոկրինոլոգի, և նրան պետք է շուրջօրյա ռեժիմով թթվածին տրամադրել։

Ըստ պաշտպանի՝ Գրիգորյանի ոտքերն այտուցված են, ոտքերի 90 տոկոսը դարձել է անզգա և նրա մոտ գանգրենա է առաջանում։ Նման հիվանդության պայմաններում անձի կալանքը չփոխելը պաշտպանական կողմը որակեց որպես հաշվեհարդար:

Դատարանը Գրիգորյանի խափանման միջոցի գործով որոշումը կհրապարակի ժամը 14:00-ին: