Վճռաբեկ դատարանի նախկին նախագահ Արման Մկրտումյանի առանձնատան վրա հարձակման գործով մեղադրյալ Հովհաննես Ռիժենկոյի պաշտպան Արման Արզումանյանը կարծում է, որ Մկրտումյանի գործողություններին պատշաճ քրեաիրավական գնահատական չի տրվել և նրա նկատմամբ պետք է քրեական հետապնդում իրականացվի: Պաշտպանը նախաքննության ավարտին նման միջնորդություն է արել, որը, սակայն, մերժվել է: Մերժման որոշումն Արման Արզումանյանը բողոքարկել է դատարան:

Երևան քաղաքի ընդհանուր իրավասության դատարանում, նախագահությամբ դատավոր Վարդան Արմենակի Գրիգորյանի, այսօր տեղի ունեցավ դատական նիստ, որի ընթացքում Արման Արզումանյանը ներկայացրեց բողոքը:

Վճռաբեկ դատարանի նախկին նախագահի առանձնատան վրա հարձակումը, հիշեցնենք, տեղի է ունեցել 2018 թվականի օգոստոսի 28-ին: Մկրտումյանն ու որդին՝ Գոռ Մկրտումյանը, անձամբ են վնասազերծել իրենց բակ մուտք գործած անձանց: Վերջիններս գործով տուժողի կարգավիճակ ունեն:

Հարձակման բուն գործն արդեն դատարանում է, ամբաստանյալի կարգավիճակ ունի երեք անձ` Հովհաննես Ռիժենկոն, Գագիկ Դանոյանը և Մայիս Մկրտչյանը, որոնք մեղադրվում են ավազակային հարձակման, ապօրինի զենք պահելու և սպանության փորձի մեջ:

Ըստ պաշտպան Արման Արզումանյանի՝ նախաքննական մարմինն, ինչպես նաև քրեական գործի նկատմամբ հսկողություն իրականացնող դատախազը տարբերակված մոտեցում են ցուցաբերում միևնույն դեպքի ընթացքում նույնանման արարքներ կատարած դատավարության մասնակիցների՝ տուժողի և մեղադրյալի գործողություններին իրավական գնահատական տալու հարցում:

Մասնավորապես՝ մի դեպքում ծայրահեղ խիստ՝ սպանության մեղադրանք է առաջադրվել հարձակման գործով անցնող անձանց՝ հիմնվելով ենթադրությունների և սուբյեկտիվ դատողությունների վրա, մյուս դեպքում՝ օբյեկտիվ հիմք ունեցող սպանության փորձն անհրաժեշտ պաշտպանություն է որակվել:

Մասնավորապես, ըստ Արման Արզումանյանի՝ քննիչը եզրահանգման է եկել, որ «Հովհաննես Ռիժենկոն ավազակային հարձակում կատարելու նպատակով ինքնաձիգով զինված ապօրինի մուտք է գործել Արման Մկրտումյանին պատկանող Կոտայքի մարզի Ձորաղբյուր գյուղի առանձնատուն: Առանձնատան բակում տեղադրված տեսանկարահանող սարքավորումների տեսագրություններով տեսնելով առանձնատուն ապօրինի մուտք գործած Հովհաննես Ռիժենկոյին և մյուսներին` առանձնատան սեփականատեր Արման Մկրտումյանը և վերջինիս որդին՝ Գոռ Մկրտումյանը դուրս են եկել առանձնատան բակ: Հովհաննես Ռիժենկոյի, Մայիս Մկրտչյանի և Գագիկ Դանոյանի կողմից զինված հարձակումը կանխելու նպատակով Գոռ Մկրտումյանը «Վալտեր» տեսակի գազային ատրճանակով կրակել է Հովհաննես Ռիժենկոյի դեմքին, ապա ծեծկռտուք է սկսվել վերջիններիս միջև, ուստի տուժողներ Արման և Գոռ Մկրտումյանների կողմից Հովհաննես Ռիժենկոյին վնասազերծելիս և այդ ընթացքում նրան մարմնական վնասվածքներ պատճառելով անհրաժեշտ պաշտպանության սահմանազանցում տեղի չի ունեցել, քանի որ պաշտպանվողները կիրառել են պաշտպանական այնպիսի միջոցներ և հնարքներ, որոնց կիրառումն ակնհայտ կերպով բխել է ոտնձգության բնույթից, վտանգավորությունից և իրադրությունից: Այսինքն՝ Հովհաննես Ռիժենկոյին Արման և Գոռ Մկրտումյանների պատճառած մարմնական վնասվածքները եղել են իրավաչափ»:

Մինչդեռ, ըստ Արման Արզումյանի, գործում առկա տեսանյութերից մեկում երևում է, թե ինչպես է Արման Մկրտումյանն ատրճանակի բռնակով հարվածում Հովհաննես Ռիժենկոյին՝ չնայած այն հանգամանքին, որ վերջինս դիմադրություն ցույց չէր տալիս:

Ըստ պաշտպանի՝ Մկրտումյանի տան անվտանգության տեսախցիկների ֆիքսած կադրերում երևում է, որ Գոռ Մկրտումյանը սկզբում իր մոտ գտնվող «Վալտեր» տեսակի գազային ատրճանակով կրակում է Հովհաննես Ռիժենկոյի դեմքին, և այդ ընթացքում Արման Մկրտումյանը ինչ-որ առարկայով հարվածներ է հասցնում Ռիժենկոյի մարմնի տարբեր մասերին: Տեսանյութերից  երևում է, որ ինքնաձիգն արդեն գտնվում է Գոռ Մկրտումյանի ձեռքում և դրանով հարված է հասցնում Հովհաննես Ռիժենկոյին: Ըստ պաշտպանի՝ այդ պահին զինված հարձակումն արդեն դադարած է եղել:

Արման Արզումյանի խոսքով՝ վայրկյաններ անց Արման Մկրտումյանը ատրճանակի բռնակով մի քանի հարված է հասցնում Հովհաննես Ռիժենկոյի գլխի շրջանում, տեսանյութից ակնհայտ է դառնում, որ բռնության են ենթարկվում ոչ թե Արման և Գոռ Մկրտումյանները, այլ Հովհաննես Ռիժենկոն, այսինքն՝ վերջինիս կողմից բռնությունը և/կամ դիմադրությունը դադարել է, նա արդեն պաշտպանվում է: Պաշտպանի գնահատմամբ՝ Հովհաննես Ռիժենկոն գրեթե ուշաթափ է եղել, չի կարողացել կառավարել մարմինը՝ կոորդինացիան կորցրել և տեսողությունը մթագնել է՝ հաշվի առնելով, որ դեմքին կրակել են գազային ատրճանակով:

«Նկատվում է, որ վերջինս գնում է դեպի տան ելքը, չի դիմադրում անգամ Գոռ Մկրտումյանին, անգամ ի վիճակի չէ փախչել, բայց այնուհետև տեսանյութի ժամը 22:24:55-ից Արման Մկրտումյանը մոտենում է արդեն իսկ անպաշտպան և բազմաթիվ վնասվածքներից հյուծված Հովհաննես Ռիժենկոյին ու ատրճանակի բռնակով մի քանի հարվածներ է հասցնում վերջինիս գլխին, և, աներկբա, հարվածները դադարում են ատրճանակը Արման Մկրտումյանի ձեռքից ընկնելու հետևանքով»,- ասաց Արման Արզումանյանը:

Ըստ պաշտպանի՝ ատրճանակի մետաղական բռնակով բազմաթիվ հարվածներ գլխին հասցնելը կարող էր հանգեցնել մահվան: Արզումանյանի տպավորությամբ՝ Արման Մկրտումյանի հարվածներն անմիջականորեն ուղղված են եղել Ռիժենկոյին կյանքից զրկելուն, և հանցանքն ավարտին չի հասցվել անձի կամքին հակառակ հանգամանքներով, այն է՝ ատրճանակը ձեռքից ընկնելու հետևանքով:

Պաշտպանը, մեջբերելով իրավական մի շարք դիրքորորոշումներ, հանգեց հետևության, որ Արման Մկրտումյանի գործողությունները դուրս են եկել անհրաժեշտ պաշտպանության տիրույթից և դատարանին խնդրեց վերացնել «քրեական հետապնդում չիրականացնելու մասին» Հատուկ քննչական ծառայության կոռուպցիոն, կազմակերպված և պաշտոնեական հանցագործությունների քննության վարչության հատկապես կարևոր գործերի քննիչ Վոլոդյա Սիմոնյանի որոշումը և որոշում կայացնել Հովհաննես Ռիժենկոյի իրավունքների և ազատությունների խախտումը վերացնելու` վարույթն իրականացնող մարմնի պարտականության մասին:

Արզումանյանը դատարանին միջնորդեց նաև նիստի ընթացքում հետազոտել գործում առկա տեսանկութերը: Կասկածի տակ չդնելով քննիչի անաչառությունը՝ Արզումանյանն, այնուամենայնիվ, չբացառեց, որ տեսանյութի` իր կողմից մատնանշված հանգամանքները կարող է նկատած չլինել: Դատարանը, սակայն, մերժեց միջնորդությունը, և տեսանյութը չհետազոտվեց:

Քննիչ Վոլոդյա Սիմոնյանն, անդրադառնալով պաշտպանի հայտնած այն մտքին, թե գուցե քննիչի ուշադրությունից որևէ հանգամանք վրիպած լինի, նշեց, որ մի քանի անգամ մանրամասն ուսումնասիրվել է տեսանյութը, որ դրանում շատ պարզ երևում է անձանցից յուրաքանչյուրի գործողությունը: Քննիչը նաև նշեց, որ Հովհաննես Ռիժենկոյի ատրճանակն, ըստ քրեական գործով ստացված փորձաքննության եզրակացության, բերված է եղել մարտական դիրքի: Ըստ Սիմոնյանի՝ Արման և Գոռ Մկրտումյանները անհրաժեշտ պաշտպանության են դիմել:

Կողմերին լսելուց հետո դատարանը հեռացավ խորհրդակցական սենյակ՝ բողոքի վերաբերյալ որոշում կայացնելու, որը կհրապարակվի հուլիսի 19-ին: