HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տիրայր Մուրադյան

Ըստ գործարարի՝ Սամվել Կարապետյանի եղբորորդին Երևանում ծեծել է իրեն և պահանջել 10 միլիոն եվրո

Գործարար Վահե Պարազյանը հուլիսի 3-ին դուրս է գալիս Երևան քաղաքի Ալեք Մանուկյան փողոցում գտնվող մարզասրահից և սպասում իր վարորդին: Մինչ վարորդի գալը նրան են մոտենում չորս հոգի, որոնցից մեկը հարցնում է՝ Վահեն դո՞ւ ես: Վահե Պարազյանը պտտվում և տեսնում է, որ Նարեկ Կարապետյանն է հարցնողը՝ ԱԺ նախկին պատգամավոր Կարեն Կարապետյանի որդին, «Տաշիր» ընկերությունների խմբի առաջին փոխնախագահը: «Ինքն էր և հետը 3 թիկնապահ: Հարձակվեցին վրաս, առաջինը ինքը խփեց, օրը ցերեկով: Ես թյուրիմացության մեջ եմ, հարցնում եմ՝ ի՞նչ է եղել: Մինչև զանգեցի ընկերներիս, արագ նստեցին մեքենաներն ու գնացին»,- «Հետք»-ի հետ զրույցում պատմեց գործարարը:

Միջադեպից հետո երիտասարդ գործարարը գտնում է Նարեկ Կարապետյանի հեռախոսահամարը, զանգահարում է և գնում հանդիպման Մաշտոցի պողոտայում Կարապետյանին պատկանող «Սիզնս» սրճարանում (SEASONS): «Ասում եմ՝ ուզում եմ մենակ քո հետ հանդիպեմ: Ասում է, բա արի, Վահե ջան: Գնում եմ, մի 100 հոգի, ինչքան «ախռանիկ» ունի ընդե են, լցված այս ու այն կողմ: Նստած է կաֆեում, հարցրեցի՝ ի՞նչ կա իմ հետ: Ասեց՝ դուք չգիտե՞ք, որ մեր ընտանիքի հետ հարցեր ունեք: Ասեցի՝ հոպարիդ հետ նկատի ունե՞ս (Սամվել Կարապետյանի, «Տաշիր» ընկերություների խմբի նախագահ), ասեց՝ հա: Հարցրեցի՝ դու կա՞ս այդքան, որ այդ հարցը բարձրացնում ես, հոպարդ տեղյա՞կ է դրանից: Ասեց հա, ես եկել եմ իմ ընտանիքի անունից խոսեմ»,- սրճարանում կայացած հանդիպումից մանրամասներ պատմեց Վահե Պարազյանը և շարունակեց, որ Նարեկ Կարապետյանն ասել է, որ նա ՌԴ-ում պարտքեր ունի իր հորեղբորը:

«Ասում է՝ դուք մտել եք հոպարի դաշտ: Ասեցի՝ եթե հոպարիդ է թվում, որ դա իր դաշտն է, իր դաշտը չի, դա ազատ տեղ է: Պետական հիմնարկ է եղել: Ասեց՝ դուք միակ ելք ունեք, եթե ձեզ թվում է, որ Հայաստան եք եկել, ապահովության մեջ եք, ես քեզ ասեմ, որ դու սխալվում ես, հենց այդպես: Ասում եմ՝ Նարեկ, սպառնո՞ւմ ես: Ասում է՝ ես քեզ զգուշացնում եմ, որ կարամ մարդ ասեմ, որ ձեր համար ահավոր պրոբլեմ կլինի: Ասում է՝ դուք ստեղ մի հատ ելք ունեք, լավ մտածի, Վահե, դու էդ փողերը, մենք այստեղ ֆոնդ ունենք Արցախի համար, էդ փողերը (10 մլն եվրո) բերում, մուծում ես ֆոնդին, մենք ուղարկում ենք Արցախ: Ասում եմ՝ իմ հաշվին ուզում եք Արցախին լավություն անե՞ք, դուք արեք: Ասում եմ՝ հոպարդ ինձ 1.5 տարի նստացրեց, իմ ընտանիքին էս օրը գցեց, բիզնեսս խլեց, ես փոխանակ ասեմ՝ ինչի եք իմ գլխին այդպիսի բան արել, մի հատ էլ դուք եք ասում, դուք եք ինձ պարտք: Ասում է՝ ոնց որ խառնում ես, ուզում ես հենց վաղն էլ մի հատ «ռիչակներով խոդեմ», որ բան անե՞ս, ասում է՝ դու չես հասկանում՝ ում հետ ես խոսում»,- պատմում է Վահե Պարազյանը: Վերջինիս և Նարեկ Կարապետյանի քննարկումն արդեն շարունակվում է գործարարի բանկային հաշիվներում առկա գումարների շուրջ:

«Ասում է՝ հաշիվներդ եմ ասել ստուգեն, եթե հաշիվներիցդ փող գտնեմ, մեծ թիվ, ի՞նչ եմ անում: Ասում եմ էդ թիվը կյանքում չեմ աշխատել: Ասում է՝ 10 միլիոն եվրո որ գտնեմ հաշվիդ վրա ի՞նչ անեմ, մենք «Ցե-բե, մե-բե» (Կենտրոնական բանկ) ասել ենք: Ասեցի՝ եթե գտնեք, ես ձեզ նվեր կտամ, բայց եթե չգտաք՝ ի՞նչ եք անում»,- շարունակեց գործարարը:

Քննարկումը ընդհատվում է պայմանով, որ Նարեկ Կարապետյանը խոսի հորեղբոր՝ Սամվել Կարապետյանի հետ, որպեսզի հասկանան ինչ անել: Վահե Պարազյանն էլ խոսում է իր ծնողների հետ, ներկայացնում իրավիճակը, որից հետո Նարեկ Կարապետյանը զանգում և հրավիրում է Պարազյանին իր գրասենյակ, սակայն առաջարկը մերժվում է, և հանդիպում են կրկին նույն սրճարանում:

«Մտա ներս, տեսնեմ Նարեկը նստած է, իր տեղակալները, «ախրանիկները»: Ասեց՝ ես հոպարի հետ խոսացի, ասեց ձև չկա, ստեղ ձեր միակ ելքը, եթե ուզում եք ապրեք, չես ուզում մեր ուշադրությունը թեքենք դեպի հորդ, պետք է էդ փողը «գրեֆ» անեք: Ասեցի՝ չփորձես ընտանիքիս սպառնալ: 15 հոգով հարձակվում են վրաս, առաջինն ինքն է խփում: Ընկերս հետս էր, իրեն էլ են խփում, ջարդում, փշրում ու դուրս են գալիս: Սրճարանի մենեջերը գալիս, սառույց է տալիս, ուզում ենք դուրս գանք, չեն թողնում, բոլոր մուտքերը փակել են: Այդ պահին, որ ինձ խփում են, մորաքույրս տեսնում է, ուզում է դուռը բացի, փակ է, չի կարողանում»,- ծեծկռտուքի վերջին դրվագն է վերհիշում գործարարը:

Դրանից հետո Վահե Պարազյանը գնում է հիվանդանոց, հետո ոստիկանություն՝ բացատրություն, ցուցմունք տալու: Պարազյանը տեղեկանում է, սակայն, որ ոստիկանությունում նյութեր նախապատրաստելու փուլում բացատրություններ է տվել ոմն Տիգրան Ասլանյան, ում Վահե Պարազյանը չի տեսել: Ավելին, նա ոստիկանությունում բացատրություն է տվել, թե իբր ինքն է Ալեք Մանուկյան փողոցում Վահե Պարազյանի հետ տեղի ունեցած միջադեպին մասնակցել, իսկ Նարեկ Կարապետյանը սրճարան է հրավիրել երկուսին, որպեսզի հաշտեցնի:

10 միլիոն եվրոյի պահանջը և Սամվել Կարապետյանի ցանկությունը

Վահե Պարազյանը և եղբայրը՝ Հովհաննես Պարազյանը, ՌԴ-ում տարիներ առաջ շինարարական ընկերություններ են հիմնել: Մասնակցել են «Գազպրոմ» ընկերության հայտարարած մրցույթներին, կնքել շուրջ 7.5 միլիարդ ռուբլու պայմանագրեր և շինարարական աշխատանքներ կատարել: Հասցրել են շուրջ 3.5 միլիարդ ռուբլու պատվեր կատարել: Պարազյանների հայրն էլ այդ ժամանակ աշխատել է Սամվել Կարապետյանի ընկերությունում: 2016 թ-ին Կարապետյանը պահանջել է Պարազյանների հորից, որպեսզի որդիները դադարեցնեն իրենց աշխատանքը «Գազպրոմ»-ի հետ, սակայն մերժում է ստացել: Վահե Պարազյանի խոսքով՝ Սամվել Կարապետյանն ասել է նաև, որ եթե չդադարեցնեն «Գազպրոմ»-ի հետ համագործակցությունը, ապա նրանց ՌԴ-ից «դեպորտ» անել կտա: Պարազյանների հայրը հարկադրված ազատման դիմում է գրել և հեռացել Կարապետյանի ընկերությունից: Ամիսներ անց «Գազպրոմը» կնքված բոլոր պայմանագրերը խզելու ծանուցում է ուղարկել Պարազյանների ընկերություններին, իսկ Վահե Պարազյանին Մոսկվայում օդանավ բարձրանալուց առաջ ձերբակալել և տարել են Կալուգայի երկրամաս: Այնտեղ արդեն իրավապահները մեղադրանք են առաջադրել Վահե Պարազյանին և կալանավորել: Վերջինս մեղադրվել է շորթման և մարդ առևագնելու մեջ: Սակայն բանտում ասել են, որ եթե 10 միլիոն եվրո գումար վճարի Կարապետյանին, ազատ կարձակվի, Պարազյանը չի համաձայնել: Հետապնդում է սկսվել նրա ընտանիքի անդամների նկատմամբ, որոնք, բացառությամբ մորից, կնոջից և երեխայից՝ բոլորը ՌԴ-ից բացակայել են տևական ժամանակ: Պարազյանի մայրը հետապնդումների վերաբերյալ նամակներ է գրել ՌԴ Պետդումայի պատգամավորներին:

1.5 տարի անազատության մեջ մնալու ընթացքում Պարազյանին առաջադրված մեղադրանքները չեն հիմնավորվել, և հոդվածը վերաորակվել է: Դրանից հետո նրան մեղադրել են ինքնիրավչության մեջ և գրավով ազատ են թողել: 2018 թ-ի ապրիլի 30-ին Պարազյանը և իր ընտանիքի անդամները լքել են ՌԴ-ն՝ վերադառնալով Հայաստան: 2018 թ-ին Հայաստանում բիզնես են հիմնել և որևէ առնչություն չեն ունեցել Կարապետյանների հետ մինչև 2019 թ-ի հուլիսի 4-ը:

Մի շարք հարցերի վերաբերյալ պարզաբանումներ ստանալու նպատակով դիմեցինք Նարեկ Կարապետյանին: Վերջինս չցանկացավ պարզաբանում տալ:

Հ.Գ. Հիշեցնեք պարզապես, որ հունիսի 16-ին վարչապետ Նիկոլ Փաշինյանը «Քաղաքացիական պայմանագիր» կուսակցության 5-րդ համագումարի ընդմիջմանը հանդիպել էր «Տաշիր» ընկերության հիմնադիր, գործարար Սամվել Կարապետյանին: Նրանք զբոսնել էին Կարապետյանների կողմից վերջերս բացված այգու տարածքում:

Լուսանկարում ձախից՝ Վահե Պարազյան, Նարեկ Կարապետյան

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter