HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Երանուհի Սողոյան

«Գյումրվա ջինսը» մեկ շաբաթից հասանելի կլինի հայկական եւ ռուսական շուկաներում

«Made in Armenia» ջինսե արտադրանքով հայկական եւ օտարերկրյա շուկաները գրավելու ծրագիրը «Ռ. Զաքարյան» ՍՊԸ-ի կոմերցիոն տնօրեն Լիլիթ Զաքարյանի մտապատկերում գծագրվել էր դեռեւս 2014թ-ին: «Ես եւ ամուսինս որոշեցինք մի փոքր շեղվել ընտանեկան ավանդույթներից եւ մտնել մեզ ոչ բնորոշ ոլորտ՝ անցում կատարել գուլպա-նասկեղենի արտադրությունից ջինսե հագուստի արտադրության,- ասում է մասնագիտությամբ տնտեսագետ Լիլիթ Զաքարյանը,- մեր ընկերությունը ստեղծվել է 1926թ.-ից Լենինականում գործող գուլպա-նասկեղենի «Արշալույս» ԲԲԸ հիմքի վրա: Մենք հիմա էլ ենք գուլպա-նասկեղեն արտադրում, բայց քիչ քանակով: Շուկայում առավել խոշոր խաղացողներ կան, որոնք, ժամանակին խոշոր ներդրում անելով, միանգամից գրավեցին այն: Ոլորտում նույնիսկ գերհագեցվածություն է նկատվում, դրա համար էլ որոշեցինք փորձել այլ ուղղությամբ»:

Երկու տարի ծախսվեց նոր ոլորտի ուսումնասիրության եւ եվրոպական երկրներ՝ ջինսի արտադրությամբ հայտնի ձեռնարկություններ այցելելով. թիրախը Իտալիան էր: Մեկ տարի ծախսել են մեքենասարքավորումների գծով ապահով մատակարարի ընտրության վրա: 2017թ.-ի հոկտեմբերից սկսել են աշխատակիցների հավաքագրման եւ ուսուցման գործընթացը: Ուսուցումն ու աշխատանքի ողջ պրոցեսը մինչեւ օրս վերահսկվում է իտալացի մասնագետների կողմից: Ներկայում ունեն 90 աշխատակից եւ հետագա ընդլայնման դեպքում՝ ցուցակագրված եւս 200 հոգի: Կարող բանվորների աշխատավարձը 80 հազար դրամ է (ներառյալ հարկը), վարպետներն ավելի բարձր են վարձատրվում: Միակ պահանջը որակյալ արտադրանք տալն է:

Իտալացի մասնագետները գերադասում են ուսուցանել կարուձեւից ընդհանրապես գաղափար չունեցող կանանց ու աղջիկներին: Լիլիթ Զաքարյանի փոխանցմամբ, նախկին գիտելիքներն ու փորձը շատ դեպքերում խանգարում են՝ որոշ չափով դժվարացնելով նորի յուրացումը: «Մեր սարքավորումները բոլորն ավտոմատացված են, նախնական փորձի հարկ չկա: Օրինակ ավտոմատացված ձեւվածքի սարքը աշխատացնելու համար բավարար է համակարգչով տալ ձեւը՝ սարքը կտրում-հանում է»,- նկատում է զրուցակիցս: Նորաբաց ձեռնարկությունն աշխատում է ամսական 20 հազար միավոր հզորությամբ: 

Ջինսե երազանքն իրականություն դարձնելու համար Զաքարյան ամուսինները ներդրել են 2 մլն դոլար: 2018թ-ին Կառավարությունը ընկերությանը երեք տարի ժամկետով ազատել է ներմուծվող ապրանքների մաքսատուրքերից, նաեւ տրամադրել որոշակի այլ հարկային արտոնություններ: Կառավարությանը ներկայացրած ներդրումային ծրագրի համաձայն՝ ընկերությունը պատրաստվում է կատարել շուրջ 1,4 մլրդ դրամի չափով ներդրում: «Կառավարության տված արտոնությունը նպաստեց, որ լրացուցիչ վարկային միջոցներ չներգրավենք,- ասում է Լիլիթ Զաքարյանը,- որոշ հումքի տեսակի ներմուծման դեպքում սահմանին ավելացված արժեքի հարկը 3 տարով հետաձգվել է: Դա այս պահին մեծ աջակցություն է: Մենք հետագայում այդ կուտակված հարկը վճարելու ենք»:

«Զաքարյան» անվան տակ թողարկվող բրենդային ջինսե տաբատները Գյումրիում հասանելի կլինեն մեկ շաբաթից՝ ընկերության նորաբաց ֆիրմային խանութում: Մեկ ամսից հայկական ջինսեր կարող են գնել նաեւ Երեւանում: Գները մատչելի են լինելու՝ սկսած 5 հազար դրամից: Կլինեն նաեւ ավելի թանկ՝ լյուքս դասի ջինսեր՝ կախված կտորի արժեքից: Մեկ շաբաթից հայկական արտադրանքը կարտահանվի նաեւ Ռուսաստանի Դաշնություն: Լիլիթ Զաքարյանի փոխանցմամբ, առայժմ կաշխատեն կայանալ ռուսական շուկայում, հաջորդ ուղղությունը՝ Եվրոպան է եւ մրցակցությունը իտալական ջինսերի հետ, որոնք համարվում են լավագույնն աշխարհում:

Մեկնաբանություններ (2)

Հասմիկ
Շաաատ լավ է։
Vicken Kojababian
Good luck

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։