Ազգային ժողովի նախկին պատգամավոր Մելիք Մանուկյանի մեքենան պայթյունից հետո դեպքի վայրից հեռացրած  Մարկոս Մարկոսյանը ոստիկանության աշխատակից է: Այս մասին «Հետքի» հետ զրույցում ասաց նրա պաշտպան Հրանտ Գևորգյանը:  Նշենք, որ օգոստոսի 2-ին Երևան-Սևան ավտոճանապարհի վրա տեղի ունեցած պայթյունից հետո Մելիք Մանուկյանին պատկանող Range Rover  մեքենան դեպքի վայրից  տարվել, ապա  ետ է վերադարձվել:  Դեպքի առթիվ հարուցվել է քրեական գործ, որի շրջանակներում ձերբակալվել են Մելիք Մանուկյանի եղբայրը՝ Ռոբերտ Մանուկյանն ու Մարկոս  Մարկոսյանը:

Դեպքից հետո տեղեկություն էր տարածվել այն մասին, որ Մարկոսյանը Մելիք Մանուկյանի թիկնապահն է:  Մեզ հետ զրույցում Հրանտ Գևորգյանն ասաց, որ չի կարող հստակ ասել, թե ոստիկանության որ վարչությունում է աշխատում  Մարկոսյանը՝ չբացառելով նաև, որ  նա կարող է լինել ոստիկանության պետական պահպանության գլխավոր վարչության աշխատակից:  Այս վարչությունը զբաղվում է ինչպես պետական կառույցների, պետական նշանակության և պատմամշակութային օբյեկտների, այնպես էլ  իրավաբանական և ֆիզիկական բազմաթիվ անձանց, նրանց գույքի պահպանությամբ:

«Հետքի» հետ զրույցում Հրանտ Գևորգյանը որոշ մանրամասներ հայտնեց Range Rover-ը դեպքի վարից հեռացնելու հանգամանքների մասին:

Մասնավորապես,  ըստ փաստաբանի՝ Մարկոս Մարկոսյանը մեքենան ցանկացել է տանել և կայանել դեպքի վայրի հարևանությամբ գտնվող գործարանում: Խոսքը Մելիք Մանուկյանին պատկանող ապակե տարաների գործարարի մասին է:

Հրանտ Գևորգյանն ասում է, թե Ոստիկանության հատուկ պահպանվող տարածքում, որտեղ պահվում են մեքենաներն, անվտանգ չէ:

«Ոստիկանության բակում մեքենաները լցվում են,  պատասխանատու չկա, տեր ու տիրական չկա, մեքենաները թալանում, ջարդում են: Թանկանոց մեքենա է, եթե տանեին, ջարդեին կամ թալանեին, մեծ վնաս կպատճառվեր»,- ասաց Հրանտ Գևորգյանը:

Ըստ փաստաբանի՝ այն ժամանակ, երբ Մարկոսյանը մեքենան տարել է, դեպքի վայրի զննությունն արդեն ավարտված է եղել, և մեքենան տանելն ու վերադարձնելը գործում ոչինչ փոխել չէր կարող:

«Մարկոսյանն այն տանում էր գործարան, որպեսզի փակի տակ պահեր, բանալին հանձներ քննիչին, որպեսզի վերջինս տնօրինի»,- ասաց Գևորգյանը:

Դիտարկմանը, որ ոստիկանը Մարկոսյանին հորդորել է չտանել մեքենան, բայց, այնուամենայիվ, Մարկոսյանը դա արել է, Գևորգյանը պատասխանեց,  թե նա  չի հասկացել, որ չեն թույլատրել տանել:

«Որ  խոսել են մեքենան տեղափոխելու հետ կապված, ինքը մտածել է, թե  թույլտվություն կա  և տարել է: Ոստիկաններից մեկը կանգնած է եղել 4-5 մետր հեռավորության վրա, ասել է՝ Մարկոս մի՛ տար, պատասխանել է, թե թույլտվությւոն ունի: Եթե իմանար, որ թույլտվություն չկա, չէր տանի: Պարզապես տարել է, 15 րոպեից նորից վերադարձրել է ոստիկանություն: Ընդամենը 15 րոպեի պատմություն է»,- ասաց Հրանտ Գևորգյանը: Վերջինս հիշեցրեց, որ Մարկոսյանը պայթյունի հետևանքով ուղեղի ցնցում է ստացել: Պաշտպանն ասաց, որ  Մարկոսյանը պայթյունի գործով տուժող ճանաչված անձանցից մեկն է, գտնվելիս է եղել մեքենայի մեջ:

Ըստ գործի նյութերի՝  Մարկոսյանին մեքենան դեպքի վայրից տանելուն դրդել է Մելիք Մանուկյանի եղբայրը՝ Ռուբերտ Մանուկյանը: Մեր հարցին, թե այս հանգամանքի վերաբերյալ ի՞նչ է հայտնել  Մարկոս  Մարկոսյանը, Հրանտ Գևորգյանն ասաց, թե իր պաշտպանյալը դեռևս ցուցմունք չի տվել:

Հիշեցնենք, որ Մանուկյանի մեքենայի պայթյունը տեղի է ունեցել օգոստոսի 2-ին՝ Երևան-Սևան ավտոճանապարհի վրա: Միջադեպի առթիվ քրեական գործ է հարուցվել սպանության փորձի և պայթուցիկ նյութեր պահելու հոդվածներով: Մեքենան դեպքի վայրից հեռացնելու գործով կասկածյալի կարգավիճակ ունեն Մարկոս Մարկոսյանն ու Ռոբերտ Մանուկյանը: Ըստ կասկածանքի, Մանուկյանն է Մարկոսյանին դրդել մեքենան տանել դեպքի վայրից:

Նշենք, որ Մարկոս Մարկոսյանի ձերբակալման դեմ Հրանտ Գևորգյանը բողոք է ներկայացրել դատարան: Կոտայքի մարզի ընդհանուր իրավասության դատարանը, այսօր հրապարակել է որոշում` նրա ձերբակալումն իրավաչափ  ճանաչելու վերաբերյալ: