2008 թվականի Մարտի իրադարձությունների առթիվ հարուցված քրեական գործի շրջանակներում ցուցարար Զաքար Հովհաննիսյանին սպանելու մեջ մեղադրվող Գեղամ Պետրոսյանը քիչ առաջ ազատ է արձակվել ԱԱԾ մեկուսարանից: Այս մասին  «Հետքի» հետ զրույցում ասաց Պետրոսյանի պաշտպան Վաղարշակ Գևորգյանը: Վերջինս նշեց, որ Պետրոսյանի նկատմամբ խափանման միջոց է ընտրվել չհեռանալու մասին ստորագրությունը:

Դատարանի որոշմամբ  ոստիկանության զորքերի հրամանատարի նախկին տեղակալ 70–ամյա Գեղամ Պետրոսյանի նկատմամբ կալանքը որպես խափանման միջոց էր ընտրվել երկու ամսով: Այսօր լրացել է երկամսյա կալանքի ժամկետըն ու Հատուկ քննչական ծառայությունն այն  երկրարացնելու միջնորդություն չի ներկայացրել  դատարան:

Նշենք, որ Հայաստանի դատական պրակտիկայում հազվադեպ հանդիպող երևույթ է սպանության մեջ մեղադրվող անձի նկատմամբ «ստորագրություն» խափանման միջոցի ընտրությունը:

Գեղամ Պետրոսյանին ձերբակալելու պահից սկսած` նրա պաշտպանը պնդում է, որ դեպքը, որի համար նրան սպանության մեղադրանք են առաջադրել, առհասարակ տեղի չի ունեցել:

Նշենք, որ Գեղամ Պետրոսյանի դեմ ցուցմունք է տվել ոստիկանության մի սպա` հայտնելով, որ սպանված Զաքար Հովհաննիսյանը ցանկացել է երկաթյա ձողով հարվածել  Պետրոսյանին, վերջինս էլ կրակել է:

Պետրոսյանը ձերբակալվել է հունիսի 4-ին, և հունիսի 6-ին` կալանավորվել:

Լուսանկարը՝ Գերման Ավագյանի