HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Դրական բնութագրվող ցմահ դատապարտյալ Աշոտ Մանուկյանն ազատ չի արձակվի

Ցմահ դատապարտյալ Աշոտ Մանուկյանը պայմանական վաղաժամկետ ազատ չի արձակվի: Արմավիրի մարզի ընդհանուր իրավասության դատարանը` նախագահությամբ դատավոր Վահե Խալաթյանի, Մանուկյանին պայմանականորեն ազատ արձակելու միջնորդագիրը մերժելու մասին որոշումը հրապարակել է այսօր:

Մանուկյանի վաղաժամկետ ազատ արձակման հարցով Արմավիրի մարզի դատարանում մի քանի դատական նիստ է տեղի ունեցնել: Երեկ կայացած նիստի ընթացքում գործով դատախազը առարկել է Մանուկյանի ազատ արձակման դեմ, որից հետո դատարանը հեռացել է խորհրդակցական սենյակ՝ որոշում կայացնելու:

Նշենք, որ Արդարադատության նախարարության պրոբացիոն ծառայությունն Աշոտ Մանուկյանի ազատ արձակման վերաբերյալ դրական, իսկ քրեակատարողական ծառայությունը՝ բացասական եզրակացություն է տվել: Հատկանշական է, որ թեև տարբերվող եզրակացություններին՝ այս երկու կառույցներն էլ Աշոտ Մանուկյանին բնութագրել են դրական:

Դատական նիստերից մեկին ներկայացել է նաև «Արմավիր» քրեակատարողական հիմնարկի ներկայացուցիչ Նորայր Գրիգորյանն ու հայտարարել, որ Մանուկյանն ուղղվել է:

Մանուկյանին ներել են նաև տուժողների ծնողները: Նման փաստերի առկայության պայմաններում, փաստորեն, դատարանը գտել է, որ Աշոտ Մանուկյանը պետք է մնա անազատության մեջ:

Դատապարտյալն անազատության մեջ է 1996 թվականից: Մեղադրվել և դատապարտվել է երեք զինծառայողի սպանության համար:

Մանուկյանը հեղինակել է «Հանցագործություն, ողբերգություն, տառապանքներ...» անունը կրող գրքույկը, որում պատմում է 23 տարի առաջ տեղի ունեցած իրադարձությունների և դրանց հետևանքով ցմահ ազատազրկված լինելու, իր զղջման մասին՝ երիտասարդներին հորդորելով չկրկնել իր սխալը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter