HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Թանկարժեք անշարժ գույքի գույքահարկի կտրուկ բարձրացման նախագիծը խորհրդարանն առաջին ընթերցմամբ ընդունեց

Խորհրդարանն առաջին ընթերցմամբ 92 կողմ, 15 դեմ և 2 ձեռնպահ ձայների հարաբերակցությամբ ընդունեց Կառավարության ներկայացրած «Անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանելու մասին» նախագիծը, որով առաջարկվում է անշարժ գույքի գույքահարկում փոփոխություններ՝ մոտարկում շուկայական արժեքին: Այս փոփոխություններով առաջարկվում է ստեղծել միասնական կադաստրային գնահատման համակարգ և վերացնել կադաստրային արժեքների իրական կյանքում ու շուկայում առկա «հսկայական և անընդունելի տարբերությունը», ինչպես նաև պետական և համայնքային հողերը օտարել կամ վարձակալության տալ շուկայականին մոտարկված տրամաբանությամբ:

Մինչ քվեարկությունը վարման կարգով խոսեցին բոլոր խմբակցություններից:

«Բարգավաճ Հայաստան խմբակցության պատգամավոր Նաիրա Զոհրաբյանն ասաց, որ իրենց խմբակցության պատգամավորները հանձնաժողովում նախագծի քննակմանը դեմ են քվեարկել, և ճիշտ են արել, քանի որ ըստ պատգամավորի՝ օրենքը թերի է:

«Սակայն, խմբակցությունում քննարկելուց հարցը հասկացանք, որ այն հնարավոր է տարատեսակ շահարկումների առիթ տա, ուստի մենք կողմ ենք քվեարկում»,- ասաց նա: «Երևանում բիզնես ունեցող անձի՛նք, ուզում եմ տեղեկացնել, որ այս օրենքի հնարավոր բոլոր բացասական հետևանքների համար պատասխանատվություն է կրելու քաղաքական մեծամասնությունը: Մենք կողմ ենք քվեարկում՝ տարատեսակ շահարկումների տեղիք չտալու համար»,- ասաց Նաիրա Զոհրաբյանը:

«Լուսավոր Հայաստան» խմբակցության պատգամավոր Մանե Թանդիլյանը հիշեցրեց, որ օրենքն ուժի մեջ է մտնելու 2021 թվականից, և որպեսզի չլինի այնպիսի իրավիճակ, որ հետագայում օրենքի սահմադրականությունը վիճարկելու համար դիմեն Սահմանադրական դատարան, կոչ արեց այժմ դեմ քվեարկել և աշխատել օրենքի փոփոխությունների վրա:

«Իմ քայլը» խմբակցության պատգամավոր, Տնտեսական հարցերի հանձնաժողովի նախագահ Բաբկեն Թունյանն ասաց, որ սահմանադրականության վերաբերյալ հարցը կարղ են քննարկել առաջինից երկրորդ ընթերցում ընկած ժամանակահատվածում: «Ինչ վերաբերում է բուն օրենքին՝ շատ լավ օրենք է, մտահոգվելու բան չկա, էս օրենքից անհանգստանալու կարիք ունեն միայն այն մարդիկ, որոնք անշարժ գույքի խոշոր սեփականատեր են ու արդարացի մակարդակից շատ քիչ են հարկվում: Կոչ եմ անում միաձայն կողմ քվեարկել»,- ասաց նա:

Ի վերջո քննարկումներից հետո նախագիծն առաջին ընթերցմամբ դրվեց քվեարկության: Օրենքի նախագիծը պետք է քննարկվի նաև երկրորդ ընթերցմամբ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։