Ռոբերտ Քոչարյանի խափանման միջոց կալանավորումը ազատազրկման հետ չկապվող խափանման միջոցով փոխարինելու վերաբերյալ նրա պաշտպանների միջնորդությունը մերժելուց հետո փաստաբան Հայկ Ալումյանը հայտարարեց, որ թե՛ այսօր, և թե՛ նախորդ նիստին հրապարակված որոշումները կայացվել են դատարանի նկատմամբ բիրտ, բացահայտ, աննախադեպ ճնշումների ազդեցության տակ:

«Դատարանն այսպիսով դարձել է գործիք՝ պարոն Քոչարյանի նկատմամբ քաղաքական հետապնդումների համար։ Այսօր դատարանը գործում է որպես գործադիր իշխանության գործիք»,- ասաց Հայկ Ալումյանը՝ նշելով, որ դատարանը զրկվել է սեփական կամքից:

«Դուք հիմա էստեղ գործում եք ընդամենը դատարանի տեսքով, բայց ոչ բովանդակությամբ, այստեղ բովանդակային առումով դատարան գոյություն չունի։ Մեր պաշտպանյալը ՀՀ-ում զրկված է դատարանի իրավունքից՝ դրանից բխող բոլոր հետեւանքներով հանդերձ»,- ասաց Ալումյանը։

Վերջինս հիշեցրեց վարչապետ Նիկոլ Փաշինյանի խոսքերն այն մասին, որ Հայաստանում դատական համակարգում գոյություն ունեն պատերի տակ վնգստացող դատավորներ, և այդ հանգամանքն իր հրապարակային ելույթներից մեկում հաստատել է նաև Բարձրագույն խորհրդի նախագահ Ռուբեն Վարդազարյանը:

Հայկ Ալումյանը հիշեցրեց, որ Ռուբեն Վարդազարյանն ասել է նաև, որ դատական համակարգում գիտեն, թե ում է նկատի ունեցել վարչապետը, սակայն հանրությունը չգիտի այդ վնգստացող դատավորների ցանկը:

Ալումյանի խոսքով` իրենք դիմել են Ռուբեն Վարդազարյանին, որպեսզի վերջինս տրամադրի այդ ցանկը:

Մինչ այդ մենք ուզում ենք իմանալ` Դուք  վնգստացող դատավորների ցանկում կա՞ք, հարգելի՛ դատարան»,- Աննա Դանիբեկյանին դիմելով`ասաց Հայկ Ալումյանը` նշելով նաև, որ իրենք ցանկանում են միջնորդել, որպեսզի դատավորն ինքնաբացարկ հայտնի:

Դատավոր Դանիբեկյանը հիշեցրեց, որ պաշտպանի խոսքերը կարող են գնահատվել որպես դատարանի նկատմամբ անհարգալից վերաբերմունքի և հանգեցնել նրա նկատմամբ դատական սանկցիայի կիրառման:

«Ես հիշեցնեմ, որ Դուք չէիք վիրավորվում, երբ այդ ամենն ասում էր վարչապետը, Դուք վիրավորված լինելու նշաններ չեք տվել, երբ դա ասել է Բարձրագույն դատական խորհրդի նախագահը, ես անձամբ Ձեզ կամ որեևէ մեկին վնգստացող դատավոր չեմ անվանում, բայց ԲԴԽ նախագահը հրապարակայնորեն հայտարարել է, որ այդպիսի դատավորներ կան, և դատական համակարգում նրանց անունները հայտնի են: Մեզ հայտնի չեն, մենք ուզում ենք ճշտել, բա մենք չիմանա՞նք՝ ում մասին է, մենք մտավախություն ունենք, որ կարող է Ձեր մասին է»,- ասաց Հայկ Ալումյանը:

Աննա Դանիբեկյանը նշեց, որ դատարանում ԲԴԽ նախագահի կամ վարչապետի հայտարարությունները չեն քննարկվում:

«Դուք այն թևում եք գտնվում և գտնվում այն թևի ազդեցության տակ, որը քաղաքական հետապնդում է սանձազերծել պարոն Քոչարյանի նկատմամբ»,- ասաց Ալումյանը` դատարանին խնդրելով իրենց մեկ աշխատանքային օր ժամանակ տրամադրել` ինքնաբացարկի միջնորդություն ներկայացնելու համար:

Դատավորի գործողությունների վերաբերալ փորձեց առարկություն ներկայացնել Յուրի Խաչատուրովի պաշտպան Միհրան Պողոսյանը, սակայն դատարանը նրան թույլ չտվեց: Պողոսյանը հայտարարեց, որ դատավորն այսպիսով իր պաշտպանյալ Յուրի Խաչատուրովին զրկում է արդար դատաքննության իրավունքից։

Դատական հաջորդ նիստը նշանակվեց հոկտեմբերի 7-ին: