«Սանիթեք»-ը չի պատրաստվում շրջված աղբարկղները հեռացնել փողոցներից
«Այս պահին չենք պատրաստվում հավաքել մեր աղբադույլերը ոչ մի տեղից։ Ոնց իրենք կան, այդպես էլ թողնում ենք։ Թե քաղաքապետարանը ինչ է անում, դա իրենց իրավասության դաշտում է»,- այս մասին «Հետք»-ին հայտնեց «Սանիթեք» ընկերության հասարակայնության հետ կապերի պատասխանատու Քնարիկ Առաքելյանը։
Վերջինս ընդգծեց, որ աղբարկղների տեղաշարժը, փոփոխությունները կատարվում են առանց իրենց ընկերության հետ համաձայնության կամ համատեղ որոշման․ «Թե ինչու են շրջում` չգիտենք, բայց տեղեկացել ենք, որ շրջելուց հետո որոշ աղբադույլեր իրենք տեղափոխում են բակային տարածքներ՝ քանակները շատացնելու համար, իսկ որոշները տանում են ինչ-որ պահպանվող տարածք»,- նշեց Քնարիկ Առաքելյանը։
Ըստ ընկերության հասարակայնության հետ կապերի պատասխանատուի՝ հստակ որոշում չկա, թե ինչ քայլեր է ձեռնարկելու ընկերությունը, կամ երբ է հավաքելու աղբարկղները։
Թեև «Սանիթեք» ընկերությունը սեպտեմբերի 1-ից Երևանի աղբահանությամբ չի զբաղվում, սակայն, ըստ Քնարիկ Առաքելյանի, ընկերությունը քաղաքապետարանի հետ կնքած պայմանագրով շարունակում է մնալ աղբահանությունն իրականացնող օպերատոր։
Հավելենք, որ այս պահին չեն գործում ընկերության «8090» հեռախոսահամարը, պաշտոնական կայքն ու ֆեյսբուքյան էջը։
Հիշեցնենք, որ «Երևանի աղբահանություն և սանիտարական մաքրում» համայնքային հիմնարկը նոր աղբամանները տեղադրում է նույն տեղում, որտեղ նախկինում «Սանիթեք» ընկերությանը պատկանող աղբամաններն էին։ Հիմնարկը, սակայն, տարածքից չի հեռացնում «Սանիթեք» ընկերության աղբամանները․ դրանք կամ թողնում է նոր աղբամանների հետնամասում, կամ «պառկեցնում» ասֆալտին։
Երևանի քաղաքապետարանից «Հետք»-ին հայտնել էին, որ «Սանիթեք» ընկերության աղբամանները շրջված են թողնում, որ քաղաքացիները դրանցում աղբ չլցնեն, ընկերությունն էլ աղբամանները հեռացնի տարածքից։
Մեկնաբանել