«5-րդ Ալիքի» սեփականատեր Արմեն Թավադյանի գործն ուղարկվել է դատարան:  «Դատալեքս» դատական-տեղեկատվական համակարգում առկա տեղեկատվության համաձայն՝ Թավադյանին  մեղադրանք է առաջադրվել այն բանի համար, որ նա 2019թ․ մայիսի 13-ին Երևան քաղաքի Գյուլիքեխյան 20 հասցեում գտնվող Երևան քաղաքի ընդհանուր իրավասության դատարանի Ավան նստավայրի վարչական շենքի առաջին հարկում քննությամբ դեռևս չպարզված մի խումբ անձանց հետ դիտավորությամբ կոպիտ կերպով խախտել է հասարակական կարգը:

Վերը նկարագրված արարքի համար Թավադյանին մեղադրանք է առաաջադրվել քրեական օրենսգրքի 258-րդ հոդվածի 4-րդ մաով, այսինքն՝  մի խումբ անձանց կամ կազմակերպված խմբի կողմից կատարված խուլիգանությունը, որը կատարվել է զենքի կամ որպես զենք օգտագործվող առարկաների գործադրմամբ:

Խոսքը Հայաստանի երկրորդ նախագահ Ռոբերտ Քոչարյանի խափանման միջոցի գործի քննության ընթացքում դատարանի դիմաց տեղի ունեցած միջադեպի մասին է, որի ընթացքում շշով հարվածել են քաղաքացիական ակտիվիստ Վարդգես Գասպարիին:

Վերջինս Ռոբերտ Քոչարյանի խափանման միջոցի գործով նիստի ընթացքում բողոքի ակցիա էր իրականացնում դատարանի դիմաց: Նրա մոտ «Ռոբիկ սրիկա, Ռոբիկ մարդասպան» պաստառներ էին: Նրա հետ վիճաբանության մեջ մտած անձինք վերցրել էին նաև նրա պաստառը, քաշքշել նրան:

Գործը մակագրվել է Երևանի ընդհանուր իրավասության դատարանի Կենտրոնի նստավայրի դատավոր Կարեն Ֆարխոյանին: Թավադյանի նկատմամբ խափանման միջոց է ընտրված չհեռանալու մասին ստորագրությունը: