Սահմանադրական դատարանի (ՍԴ) դատավոր Ալվինա Գյուլումյանը չի պատրաստվում հրաժարական տալ։ Այդ մասին այսօր լրագրողների հետ զրույցում ասաց Գյուլումյանը՝ պատասխանելով հարցին, թե արդյոք պատրաստվո՞ւմ է վաղ կենսաթոշակի անցնել:

Վերջինս չցանկացավ մեկնաբանել ՍԴ նախագահ Հրայր Թովմասյանի լիազորությունները դադարեցնելու պահանջով Ազգային ժողովում սկսված գործընթացը: Նշենք, որ «Իմ քայլը» խմբակցության պատգամավորները պատրաստվում են դիմել Սահմանադրական դատարան՝ Թովմասյանի լիազորությունները դադարեցնելու պահանջով:

«Իմ ցանկացած պատասախան կարող է ընկալվել որպես նախնական կարծիքի արտահայտում, որի իրավունքը ես չունեմ»,- ասաց Գյուլումյանը՝ միևնույն ժանանակ վստահեցնելով, որ Սահմանադրական դատարանում այդ հարցով լինելու է օբյեկտիվ քննարկում:

Ինչպես հայտնի է, ՍԴ դատավոր Վահե Գրիգորյանը չի մասնակցել դատարանում քննված առնվազն 10 նիստի:

Լրագրողները հետաքրքրվեցին՝ հնարավո՞ր է Գրիգորյանին կարգապահական տույժի ենթարկելու գործընթաց սկսեն, ինչին ի պատասխան՝ Գյուլումյանը նշեց, որ թեև դա կարգապահական վարույթի հիմք է, ինքն անձամբ մտադիր չէ Գրիգորյանին կարգապահական տույժի ենթարկելու գործընթաց սկսել:

Հարցին՝ արդյոք գործող իշխանությունների կողմից ճնշումներ կա՞ն Սահմանադրական դատարանի նկատմամբ, Գյուլումյանը պատասխանեց.

«Գիտեք ինչ, ճնշում են նրան, ով որ ճնշվում է: Եթե դու ճնշվող դատավոր չես, ինչ կուզեն, թող կողքից ասեն: Ես կարող եմ ինձ համար պատասխան տալ, որ ինձ հնարավոր չի ճնշել, ինձ հնարավոր չի շեղել ճիշտ ուղուց»:

Մանրամասները՝ տեսանյութում: